भेरोना (एजेन्सी) – साविकको विजेता युभेन्टस्ले इटालियन सिरी ‘ए’ फुटबलको नयाँ सिजनको पहिलो खेलमा संघर्षपूर्ण जित निकालेको छ ।  किएभो भेरोनाको घरेलु मैदानमा शनिबार राति भएको खेलमा युभेन्टस्ले ३–२ को संघर्षपुर्ण जित निकालेको हो ।

युभेन्ट्सलाई जिताउन सामी खेडिरा र फेड्रिको बर्नार्डडेस्चीले समान एक गोल गरे । युभेन्ट्सले एक गोल आत्मघाती उपहार पाएको थियो । भेरोनाका माटिया बानीले एक आत्मघाती गोल गरेका थिए । यस्तै भेरोनाका मारिउस स्टेपिन्सकी र इमानुएल जियाचेरेनीले गोल फर्काए । पोर्चुगिज स्टार क्रिस्टियानो रोनाल्डोले यसै खेलबाट युभेन्ट्स र सिरी ए फुटबलमा डेब्यु गरेपनि गोल भने गर्न सकेनन् । युभेन्ट्सले यसै सिजन स्पेनिस क्लब रियल मड्रिडबाट रोनाल्डोलाई १०० मिलियन पाउन्डमा क्लबमा अनुबन्ध गरेको हो ।

युभेन्टस्ले खेलको तेस्रो मिनेटमा नै अग्रता बनाएको थियो । जर्जियो चिलियानीको पासमा खेडिराले गोल गर्न सफल भएको थियो । ३८ औं मिनेटमा मारिउसले बराबरी गोल फर्काएपछि पहिलो हाफ १–१ गोलको बराबरीमा पुगेको थियो । ५६ औं मिनेटमा इमानुएल जियाचेरेनीले गोल गरेपछि युभेन्टस् खेलमा २–१ ले पछि परेको थियो । त्यसपछि युभेन्टस् खेलमा फर्कियो । भेरोनाका माटियो बानीले आत्मघाती गोल गरेपछि खेल २–२ गोलको स्थितिमा पुगेको थियो । ९० औं मिनेटमा फेडरिकोले गोल गरेपछि युभेन्टस्लाई ३–२ को संघर्षपूर्ण जित दिलाए ।