गुइनग्याम्प (एजेन्सी) – स्टार खेलाडीद्धय नेयमार र केलियन एमबाप्पेले गोल गरेपछि पेरिस सेन्ट जर्मेन (पीएसजी) ले फ्रेन्च लिग वान फुटबलमा लगातार दोस्रो जित निकालेको छ । गुइनग्याम्पको घरेलु मैदानमा भएको खेलमा पीएसजीले १ गोलले पछि परेको स्थिति उल्ट्याएर ३–१ को जित निकालेको हो ।

पीएसजीको जितमा युवा स्टार केलियन एमबाप्पेले दुई तथा नेयमारले एक गोल गरे । गुइनग्याम्पका नोलान रुक्सले एक गोल गरे । घरेलु मैदानमा गुइनग्याम्पको २० औं मिनेटमा नोलानको गोलबाट अग्रता बनाएको थियो । एक गोलले पछि परेपछि पीएसजीले आक्रमक फुटबल खेलेपनि गोल गर्न दोस्रो हाफ नै कुर्नुपरेको थियो । ५३ औं मिनेटमा पीएसजीले पेनाल्टीमार्फत गोल गर्न सफल भएको थियो । नेयमारलाई डि–बक्समा लडाएपछि पीएसजीले पेनाल्टीको मौका पाएको थियो । जसलाई नेयमार आफैले गोलमा परिणत गरेका थिए । लिग वानको दोस्रो खेलमा नेयमारको यो दोस्रो गोल हो । यसअघि पहिलो खेलम पनि नेयमारले गोल गर्न सफल भएका थिए ।

त्यसपछि दृश्यमा विश्व विजेता फ्रान्सका एमबाप्पे आए । दोस्रो हाफमा टिमोथी वेहको स्थानमा मैदान छिरेका एमबमप्पेले ८२ औं मिनेटमा एन्जल डि मारियाको पासलाई गोलमा परिणत गरेपछि पीएसजीले खेलमा २–१ कोे अग्रता बनायो । ९० औं मिनेटमा नेयमारको पासलाई एमबाप्पेले गोलमा परिणत गर्दै टिमलाई ३–१ को सहज जित दिलाए ।

लगातार दोस्रो जितसँगै पिएसजी ६ अंकसहित लिगको शीर्ष स्थानमा रहेको छ ।