बार्सिलोना (एजेन्सी) – स्पेनिस च्याम्पियन बार्सिलोनाले आज सिजनको पहिलो खेलमा आलाभेसको सामना गर्दै छ । बार्सिलोनाको घरेलु मैदान क्याम्प नुमा खेलिने सो खेल नेपाली समय अनुसार रातिको २ बजे सुरु हुने छ ।

बार्सिलोनाका डिफेन्सर सामुयल उम्टिटीलाई थप विश्राम दिइएको कारण क्लेमेन्ट लेङलेटले लिगमा डेब्यु गर्ने देखिन्छ । अर्का डिफेन्डर सर्जि रोबर्टो सुरुवाती ११ मा फर्किने छन् । स्टार जोडी लियोनल मेस्सी र लुइस स्वारेजलाई उस्माने डेम्बेलेले साथ दिने देखिन्छ । त्यस्तै मिडफिल्डमा इभान राकिटिच, सर्जियो बुस्केट्स र फिलिप कौटिन्होले स्थान पाउने लगभग पक्का छ ।

बार्सिलोना गत सिजनको च्याम्पियन रहेको थियो भने आलाभेसले लिगमा १४ औं स्थान हांसिल गरेको थियो । आलाभेसका जोनिले आज लिग डेब्यु गर्ने छन् । आलाभेसको अग्रपंक्ति रुबेन सुब्रिनो र जोन गुइडेट्टिले सम्हाल्ने छन् । नियमित डिफेन्डर रोड्रिगो एलि घाइते रहेकाले उनको स्थानमा जिमो नाभारो खेल्ने देखिन्छ ।

गत सिजन बार्सिलोनाले आलाभेसलाई दुई खेलमा दुवै चोटी जित्न सफल भएको थियो भने अघिल्लो १० खेलमा आलाभेसलाई ९ मा हराएको छ । बार्सिलोनाले घरेलु मैदानमा अघिल्लो ३१ मध्ये २८ मा जित हात पारेकाले आज पनि जितको दाबेदार रहेको छ । जितसंगै बार्सा सिजनको सुखद सुरुवात गर्ने दाऊमा रहने छ । स्पेनिस लालिगाको अन्य खेलहरुमा आज सेल्टा भिगो र इस्पानियोल तथा भियारियल र रियल सोसियडाड भिड्ने छन् ।