टुरिन (एजेन्सी)– क्रिस्टियानो रोनाल्डो टोलीमा हुनुको अर्थ इटालियन लिग उपाधि जित्ने पक्का हुन्छ भन्ने नभएको युभेन्ट्सका प्रशिक्षक मासिमिलियानो एलिग्रीले बताएका छन् । ३३ वर्षे रोनाल्डो आश्चार्यजनक रुपमा यहि सिजन रियल म्याड्रिडबाट युभेन्ट्स पुगेका थिए । 

लिग सिजनको सुरुवातको क्रममा शनिबार किएभोविरुद्धको खेलमा पोर्चुगिज सुपरस्टार रोनाल्डो खेल्ने लगभग तय छ । रोनाल्डोको सरुवालाई सबैभन्दा महत्व दिएको युभेन्ट्सले जोआवो कानसेलो, इम्री चान, माटिया पिरिनलाई यहि सिजन भित्राएको थियो । रक्षक लियोनार्दो बोनुकी पनि क्लबमा फर्केका छन् । त्यस्तै डग्लस कोस्टा पनि बायर्नबाट स्थायी रुपमा क्लबमा फर्केका छन् ।

लिग उपाधि रक्षाको लक्ष्य सहित अघि बढ्ने युभेन्ट्सका प्रशिक्षक एलिग्रीले भने, ‘पहिलो खेलमा जहिले पनि नयाँपन रहन्छ । टिमले कसरी खेल्छ भन्ने उत्सुकता रहन्छ । रोनाल्डोले पाँच पटक बालोन डी ओर उपाधि जितिसकेका छन् । उनी पछिल्लो १० दिन अभ्यास गरेका छन् । उनीलाई तपाई फरक खेलाडीका रुपमा देख्न सक्नुहुन्छ । उनी साधारण खेलाडी होइनन् । अन्य खेलाडीका लागि उनी महत्वपूर्ण उत्प्रेरक खेलाडी हुन् ।’

प्रशिक्षक एलिग्रीले थपे , ‘रोनाल्डो हामीसँग छन् । त्यसको मतलब जित निश्चित छ भन्ने हुँदैन । उनले टोलीमा अतिरिक्त महत्व दिलाउँछन् । कागजमा हामी सिरिएको सबै भन्दा बलियो टोली हौं । तर, त्यहि नै पर्याप्त होइन । हामीले मैदानमा आफुलाई प्रमाणित गर्नुपर्ने हुन्छ । हामीले हरेक दिन आफुलार्ई प्रमाणित गर्दै जानुपर्दछ ।’