काएरो (एजेन्सी) – अफ्रिकी मुलुक इजिप्टको फुटबल लिगमा समर्थकहरुले अब खेल भइरहेको खेलमैदामा गएर खेल हेर्न पाउने भएका छन् । सन् २०१२ पछि दर्शकले पहिलो पटक मैदानमा गएर खेल हेर्न पाउने भएका हुन् ।

सन् २०१२ मा खेलका दौरान करिब ७४ जना अल अहलीका समर्थकको मृत्यु भएका कारण फेब्रुअरी २०१२ पछि खेल भइरहेका बेला खेल मैदान जान बन्देज गरिएको थियो । प्रतिबन्ध सेप्टेम्बर १ तारिखबाट फुकुवा हुने बताइएको छ । सुरुवातमा ५ हजार भन्दा बढी समर्थकलाई मैदानमा प्रवेश गर्न अनुमति दिइने छैन् । इजिप्टका खेल मन्त्रि डा. अशरफ सोभइले अब समर्थकले पनि खेलमैदानमै गएर खेल हेर्न पाउने अनुमती दिएका हुन् ।

सन् २०१२ पछि समर्थकको केहि संख्याले केही खेल हेर्न पाएका थिए । जहाँ अन्तराष्ट्रिय खेल तथा केहि क्लब स्तरिय खेलमा मात्र सहभागी थिए । सन् २०१५ को सुरुवातमा समर्थक खेल मैदान आउन थालेका थिए । तर, फुकुवा भएको छोटो समयमै २२ जना जमालेकका समर्थकको भागदौडमा  निधन भएको थियो । इजिप्टका खेल मन्त्रि डा. अशरफले पछिल्लो साता इजिप्ट फुटबल संघ र क्लबका प्रतिनिधिसँग भेटवार्ता गरेका थिए । अब निर्णयमा आन्तरिक सुरक्षा मन्त्रालयबाट सहमति मिल्ने आशा रहेको बताएका छन् ।