म्यानचेस्टर (एजेन्सी) – म्यान्चेस्टर युनाइटेडले आफ्ना गोलकिपर डेविड डे हेयासँग नयाँ सम्झौता गर्ने भएको छ । युनाइटेडसँगको नयाँ सम्झौतामा पत्रमा गोलकिपर डेविडले हस्ताक्षर गर्ने क्लब विश्वस्त रहेका बताइएको छ ।

स्पेनको राष्ट्रिय टोलीबाट खेल्दै आएका २७ बर्षीय डेभिडको युनाइटेडसँगको सम्झौता २०१९ मा सकिदै छ । उनलाई युनाइटेडसँग अन्य सिजनका लागि समेत सम्झौता लम्ब्याउन सक्ने मौका रहेको छ । गत सिजन रियल मड्रिड डेविडलाई भित्र्याउन उसका प्रतिनिधिसँग वार्ता गर्न उत्साहित थियो । सन् २०१५ देखी रियल उनलाई अनुबन्ध गर्न चाहेको खुल्दै आएको थियो । तर, रियलले ३५ मिलियन पाउण्डमा चेल्सीबाट थिवाउट कोउर्टोसलाई भित्र्यायो ।
उनी सन् २०११ मा एटलेटिको मड्रिडबाट १८.९ मिलियन पाउण्डमा युनाइटेड भित्रिएका थिए । उनलाई सर एलेक्स फर्गुसनले अदभुत क्षमता भएको खेलाडीको उपमा दिएका थिए । प्रिमियर लिगमा युनाइटेडलाई उपविजेता बनाउँदै आफ्नो प्रभावकारी प्रदर्शनका साथ उनी व्यावसायिक फुटबलरहरुको टिमको वर्ष खेलाडीमा समेत परेका थिए ।

विश्वकप २०१८ मा उनले राम्रो प्रदर्शन गर्न सकेनन् र आलोचनाका सिकार बन्न पुगे । जहाँ स्पेनकोे पहिलो खेलमा रोनाल्डोले तीन गोल गर्दै खेल ३–३ को बराबरी गरेका थिए ।  उनले यस सिजनको प्रिमियर लिगमा आफ्नो पहिलो खेलमा लेस्टर सिटी विरुद्ध उत्कृष्ट प्रदर्शन गर्दै युनाइटेडलाई २–१ ले जित दिलाउन सफल भएका छन् ।