जाग्रिव (एजेन्सी) – रसिया विश्वकपको उपविजेता टिम क्रोएसियाका फरवार्ड मारियो म्यान्जुकिकले अन्तर्राष्ट्रिय फुटबलबाट सन्यासको घोषणा गरेका छन् । ३२ वर्षीय इटालियन क्लब युभेन्टस्का स्टार म्यान्जुकिकले मंगलबार सामाजिक सन्जाल इन्स्टाग्राममा भावनात्मक सन्देश लेख्दै अन्तर्राष्ट्रिय फुटबलबाट सन्यासको घोषणा गरेका हुन् ।

‘हामी हाम्रो लक्ष्यमा पुग्न सफल भयौं । हामीले ऐतिहासिक नजिता पनि निकाल्न सफल भयौं । हामीले प्रशंसकहरुबाट न्यानो आतिथ्यता पायौं ।’ म्यान्जुकिकले लेखेका छन्, ‘प्रस्थानको लागि कुनै आदर्श समय छैन । हामीले क्रोएसियालाई विश्व च्याम्पियन बनाउन सकेनौ । तर, मलाई विश्वास छ । हामीले क्रोएसियाका लागि उत्कृष्ट फुटबल खेल्यौ । मैले मेरो आफ्नो उत्कृष्ट समय क्रोएसियन फुटबलमा बिताए । मैले ठुलो सफलता पाएको छु ।’
म्यान्जुकिकले ११ वर्ष क्रोएसियाको राष्ट्रिय टिममा रहँदै ८९ खेलमा ३३ गोल गर्न सफल भएका छन् । जुन डाभोर सुकर (४५) गोलभन्दा पछि हो ।
म्यान्जुकिकले क्रोएसियाबाट दुई विश्वकप र तीन युरोकपमा सहभागिता जनाएका छन् ।
गत जुलाईमा रसियामा भएको फिफा विश्वकपको फाइनलमा म्यान्जुकिकको टोली क्रोएसिया फ्रान्ससँग ४–२ ले पराजित भएको थियो । उक्त खेलमा म्यान्जुकिकले पनि गोल गर्न सफल भएका थिए । यस्तै म्यान्जुकिककै आत्मघाती गोलबाट क्रोएसिया खेलमा पछि परेको थियो । मारियोले सन् २००७ मा म्यासेडोनियाविरुद्धको खेलबाट सिनियर राष्ट्रिय टिममा डेब्यु गरेका थिए ।