टुरिन (एजेन्सी)– युभेन्ट्सका महान खेलाडी एवं वर्तमान उपाध्यक्ष पाभेल नेदभेदले क्रिस्टियानो रोनाल्डोलाई रियल म्याड्रिडबाट क्लबमा ल्याउन सफल हुनुलाई असाधारण कदम भनेका छन् । यो सरुवाले क्लबलाई युरोपमा थप स्थापित गर्न मद्दत पुग्ने उनको विश्वास छ ।

पछिल्ला पाँच वर्षमा ४ वटा च्याम्पियन्स लिग उपाधि जित्न सफल ३३ वर्षे रोनाल्डो यहि सिजन १ सय मिलियन युरोमा युभेन्ट्स पुगेका थिए । लगातार सात वर्ष इटालियन सिरिए उपाधि जितेपछि युभेन्ट्सले च्याम्पियन्स लिगमा भने प्रभाव जमाउन सकेको छैन । रोनाल्डोको आगमनसँगै टोली उत्साहित बनेको छ ।

नेदभेदले रोनाल्डोको आगमनले क्लबलाई युरोपको माथिल्लो क्लबमा पुर्याउने मात्र नभइ इटालियन फुटबललाई समेत राम्रो हुने बताएका छन् । ‘युभेन्ट्स युरोपका सफल क्लबहरुमा दर्ज हुनेमा कुनै शंका छैन,’ नेदभेदले भने, ‘रोनाल्डोलार्ई हामीले क्लबमा ल्याउनु भएको एउटा असाधारण कदम हो । यसले भविष्यलाई राम्रो हुनेछसँगै इटालियन फुटबललाई समेत मद्दत गर्नेछ ।’

महान मिडफिल्डर नेदभेदले इम्री च्यानको आगमनलाई सकारात्मक भएको बताएका छन् । लिभरपुलमा सम्झौता नविकरण नभएपछि च्यान युभेन्ट्समा आबद्ध भएका थिए । ‘उनको सम्झौता पनि हाम्रो लागि महत्वपूर्ण छ,’ नेदभेदले भने, ‘धेरै क्लबले उनी प्रति चासो राखेका थिए । तर हामी उनलाई लिन सफल भएका छौं । उनी रणनीतिक र प्राविधिक रुपमा  राम्रो खेलाडी हुन् ।’