लन्डन (एजेन्सी) – इंग्लिस प्रिमियर लिग क्लब म्यानचेस्टर सिटी तथा स्पेनका मिडफिल्डर डेभिड सिल्भाले अन्तर्राष्ट्रिय फुटबलबाट सन्यासको घोषणा गरेका छन् । ३२ वर्षीय सिल्भाले सोमबार सामाजिक सञ्जाल ट्वीटरबाट अन्तर्राष्ट्रिय फुटबलबाट सन्यास लिने घोषणा गरेका हुन् ।

स्पेनका डिफेन्डर जेरार्ड पिकेले सन्यासको घोषणा गरेको एक दिन पछि नै सिल्भाल अन्तर्राष्ट्रिय फुटबलबाट सन्यासको घोषणा गरेको हो । सन्यासको घोषणा गर्दै सिल्भाले अन्तर्राष्ट्रिय फुटबलबाट सन्यास लिनु आफ्नो लागि निकै कठिन रहेको बताएका छन् । ‘मलाई स्पेनको राष्ट्रिय टिमबाट खेल्दा धेरै नै गौरवको महसुस हुन्छ । किनकि यहाँ मैले उत्कृष्ट समय बिताएको छु । सन्यासको निर्णय गर्नु मेरो करियरकै सबैभन्दा गाह्रो क्षण बनेको छ ।’ सन्यासपछि सिल्भाले भनेका छन् । उनले टिमलाई सधै सम्झिरहने पनि बताएका छन् ।

१५ नोभेम्भर २००६ मा रोमानियाविरुद्धको खेलबाट स्पेनको सिनियर राष्ट्रिय टिममा डेब्यु गरेका ३२ वर्षीय सिल्भाले १२५ खेल खेल्दै ३५ गोल गर्न सफल भएका छन् । त्यसयता सिल्भा टिमका नियमित सदस्य बनेका थिए । स्पेनले २००८ मा युरोकप, २०१० मा विश्वकप र २०१२ मा युरोकप जित्दा उनी टिमका महत्वपूर्ण सदस्य थिए ।