मोरक्को (एजेन्सी) – क्याटलान क्लब बार्सिलोनाले स्पेनिस सुपरकपको उपाधि जितेको छ । सोमबार बिहान भएको खेलमा बार्सिलोनाले ला लिगा प्रतिद्धन्द्धी सेभिल्लालाई २–१ ले पराजित गर्दै ३२ औं संस्करणको स्पेनिस सुपरकपको उपाधि जितेको हो ।

बार्सिलोनालाई १३ औं पटक सुपरकप च्याम्पियन बनाउन जेरार्ड पिके र औसमाने डेम्बेलेले गोल गरे । सेभिल्लाका लागि पाब्लो सारावियाले गोल गरे ।  बार्सिलोनाले एक गोलले पछि परेको स्थिति उल्ट्याएर जित हात पारेको हो । खेलको नवौ मिनेटमा पाब्लो साराबियाले गोल गरेपछि बार्सिलोना खेलमा पछि परेको थियो । तर, बार्सिलोनाले त्यसपछि खेलमा पूनरागमन ग¥यो । ४२ औं मिनेटमा जेरार्ड पिकेले बराबरी गोल फर्काए । ७८ औं मिनेटमा औसमाने डेम्बेलेले गोल गर्दै बार्सिलोनालाई २–१ को अग्रता दिलाए ।

खेलको इन्जुरी समयमा सेभिल्ला पेनाल्टीमा चकेपछि बार्सिलोनाले खेल २–१ ले आफ्नो पक्षमा पार्दै च्याम्पियन बन्न सफल भए । इन्जुरी समयमा गोलरक्षक मार्क आन्द्रे टेर स्टेगनले एलेक्स भिडाललाई लाएपछि सेभिल्लाले पेनाल्टीको मौका पाएको थियो । विसाम विन यडरको पेनाल्टी प्रहार बचाउदै गोलरक्षक स्टेगनले आफुले गरेको गल्तीलाई कुनै गल्ती हुन दिएन ।

बार्सिलोनाको यो सिजनको पहिलो उपाधि हो । गतवर्ष बार्सिलोनाले स्पेनिस ला लिगा र कोपा डेल रेको उपाधि जितेको थियो । यस्तै बार्सिलोना स्पेनिस सुपरकप जित्ने सर्वाधिक जित्ने टोली बनेको छ । २२ पटक फाइनल पुगेको बार्सिलोनाको यो १३ औं उपाधि हो । गतवर्ष बार्सिलोना रियल मड्रिडसँग ५–१ को फराकिलो अन्तरले पराजित भएको थियो ।

स्पेनिस फुटबल फेडेरेसनले ला लिगा च्याम्पियन र कोपा डेल रे च्याम्पियन टोलीबीच सुपरकपको आयोजना गर्ने गर्दछ ।