लन्डन (एजेन्सी)- यो सिजन खेलाडी अनुबन्धमा सबैभन्दा सक्रिय बनेको इंग्लिस क्लब लिभरपुलले प्रिमियर लिग फुटबलमा प्रभावशाली जित निकालेको छ ।घरेलु मैदान एनफिल्डमा भएको खेलमा लिभरपुलले वेस्टह्याम युनाइटेडमाथि आइतबार ४–० को सानदार जित निकालेको हो ।

लिभरपुलको प्रभावशाली जितमा साडियो मानेले दुई तथा मोहम्मद सलाह र ड्यानियल स्टुरिजले समान एक गोल गरे । एनफिल्डमा एकपक्षीय बनेको खेलमा लिभरपुलले १९ औं मिनेटमासलाहको गोलबाट अग्रता बनाएको थियो । रोबर्टसनको पासलाई सलाहले कुनै गल्ती गरेनन् ।

पहिलो हाफको इन्जुरी समयमा मानेले जेम्स मिल्नरको पासमा गोल गरेपछि लिभरपुलले पहिलो हाफमा २–० को आरामदायी अग्रता बनायो । ५३ औं मिनेटमा मानेले टिमका लागि तेस्रो तथा व्यक्तिगत दोस्रो गोल गर्दा खेलमा लिभरपुल ३–० ले अघि बढ्यो । यसपटक मानेले रोबर्टो फिर्मिनोको पासमा गोल गर्न सफल भए ।

८८ औं मिनेटमा वैकल्पिक खेलाडी ड्यानियल स्टुरिजले गोल गर्दै लिभरपुललाई ४–० को फराकिलो जित दिलाए । ड्यानियल मैदान छिरेको एक मिनेट पनि नबित्दै गोल गर्न सफल भएका हुन् । उनी सलाहको स्थानमा मैदान छिरेका थिए ।

खेलभर लिभरपुलले वेस्टह्याममाथि दवाव सिर्जना गरेको थियो । वेस्टह्यामले भने कुनैपनि समय लिभरपुलको पोस्टमा आक्रमण बुन्न सकेन । प्रिमियर लिगको अर्को खेलमा आइतबार बर्नली र साउथह्याम्टनले गोलरहित बराबरी खेलेका छन् ।