बार्सिलोना (एजेन्सी) –बार्सिलोनाका रक्षक जेरार्ड पिकेले अन्तर्राष्ट्रिय फुटबलबाट सन्यास लिने निर्णय गरेका छन् । बार्सिलोनाका पूर्व प्रशिक्षक रहेका स्पेनिस टोलीका प्रशिक्षक लुइस इनरिकेलाई पिकेले आफु टोलीमा नफर्कने बताएका छन् ।

समर्थक र सञ्चारमाध्यमको आलोचनाका कारण पिकेले विश्व कप २०१८ को छनोटका क्रममा सन् २०१६ अलबानियासँगको खेलपछि अन्तर्राष्ट्रिय फुटबल छाड्ने संकेत गरेका थिए । बार्सिलोनामा जन्मेका पिकेले टोलीका अन्य साथीहरु र स्पेनका समर्थकबाट कहिले पनि खासै समर्थन पाएनन् ।

उनी काटलानको स्वतन्त्रताका पक्षमा प्रष्ट विचार राख्ने भएका कारणले पनि उनीसँग धेरै रुष्ट रहेको बताइन्छ । रसिया विश्व कपको समाप्तीपछि उनले सन्यासका विषयमा प्रष्ट पारेका थिएनन् । तर पछिल्लो महिना स्पेन टोलीका प्रशिक्षक नियुक्त भएका इनरिकेलाई उनले आफु नफर्कने जानकारी गराइसकेको बताइएको छ ।

‘केहि दिन अघि मैले प्रशिक्षक इनरिकेसँग कुरा गरेको थिए । ‘मैले उनलाई भने यो निर्णय अगाडि नै र सावधानी पूर्वक सोचेर लिएको बताए, उनले शनिबार भने, ‘राष्ट्रिय टोलबिाट खेल्दा गौरव लागेको छ । मैले यो टोलीबाट विश्व कप र युरोपियन च्याम्पियनसिप जितेको छु । अब म बार्सिलोनामा केन्द्रित हुन चाहन्छु । जति पनि समय खेल जीवन बाँकी रहन्छ म आनन्द लिन चाहन्छु । ‘

स्पेनका लागि १ सय २ खेल खेलेका पिकेले दुई वटा युरोपियन च्याम्पियनसिप र तीन वटा विश्व कप खेलेका थिए । स्पेनले सन् २०१० मा विश्व कप र त्यसको दुई वर्षपछि विश्व कप जित्दा उनी टोलीका महत्वपूर्ण सदस्य थिए ।