सेन्ट जेम्सपार्क (एजेन्सी) – इंग्लिस प्रिमियर लिगको नयाँ सिजन शुक्रबारबाट सुरु भएको छ । क्लब फुटबलमा लोकप्रिय मानिने प्रिमियर लिगको पहिलो दिन उपाधिको दावेदार म्यानचेस्टर युनाइटेडले विजयी सुरुवात गर्दा आज उपाधिको अर्को दाबेदार मानिएको टोटनह्याम हस्टपरले न्युक्यासल युनाइटेडको सामना गर्दैछ ।

खेल न्युक्यासलको घरेलु मैदान सेन्ट जेम्सपार्कमा नेपाली समय अनुसार साँझ ५ः१५ बजे सुरु हुनेछ । लिगको पहिलो चरणको खेलमा दुवै टोली खेललाई आफ्नो पक्षमा पार्ने लक्ष्यका साथ मैदान ओर्लने छ । दुवै टोलीले पुराना खेलाडीलाई नै विश्वास गर्दै समर ट्रान्सफरमा खेलाडी किनबेचमा सक्रिय भएनन् ।

टोटनह्यामसँग विश्वविजेता फ्रान्सका गोलरक्षक ह्युगो लोरिस, गोल्डेन बुट विजेता इंग्ल्यान्डका ह्यारी केनजस्ता खेलाडीहरुको साथ छ । त्यसैले टोटनह्याम सहजै खेललाई आफ्नो पक्षमा पार्ने योजनामा हुनेछ । यता, न्यु क्यासुल घरेलु मैदानमा टोटनह्यामलाई स्तब्ध पार्ने अभियानमा हुनेछ । पछिल्लो १५ भेटमा टोटनह्याम न्युक्यसालमाथि हावी देखिएको छ ।

टोटनह्यामले ८ खेलमा जित हात पार्दा न्युक्यासले ५ खेलमा जित हात पार्न सफल भएको छ । दुई खेल भने बराबरीमा सकिएको छ । अघिल्लो सिजनको दुवै खेलमा टोटनह्याम विजयी हुन सफल भएको थियो । टोटनह्यामले पहिलो खलेमा २–० तथा दोस्रो खेलमा १–० को जित निकालेको थियो । अघिल्लो सिजन कमजोर प्रदर्शन गरेको चेल्सीले पनि आजै नयाँ सिजनको सुरुवात गर्दैछ । अवे खेलमा चेल्सीले हडस्र्फिल्डको सामना गर्नेछ ।

प्रिमियर लिगमा आजको खेलहरु 
१. न्युक्यासल युनाइटेडविरुद्ध टोटनह्याम हस्टपर (साँझ ५ः१५ बजे)
२.बोर्नामाउथविरुद्ध कार्डिफ सिटी (साँझ ७ः४५ बजे)
३. फुलह्यामविरुद्ध क्रिस्टल प्यालेस (साँझ ७ः४५ बजे)
४.हडर्सफिल्ड टाउनविरुद्ध चेल्सी(साँझ ७ः४५ बजे)
५. वाटफोर्डविरुद्ध ब्रिङटोन एन्ड अल्वियोन(साँझ ७ः४५ बजे)
६. वल्भरह्याम्टन वन्डरर्सविरुद्ध एभर्टन (राति १०ः१५ बजे)