म्यानेचस्टर (एजेन्सी)– विश्व विजेता फ्रान्सका खेलाडी पाउल पोग्बाको युभेन्टस र बार्सिलोनासंग सम्बन्धित खबरका बाबजुत म्यानचेस्टर युनाइटेडमा खुसी रहेको प्रशिक्षक जोजे मौरिन्होले बताएका छन् ।

विश्वकप फुटबलमा फ्रान्सलाई जित दिलाउन महत्वपूर्ण भूमिका खेलेका पोग्बा सोमबारबाट युनाइटेडको अभ्यासमा फर्किएका हुन् । युनाइटेडले प्रिमियर लिग अन्तर्गत पहिलो खेल शुक्रवार लिसेस्टर सिटिसंग खेल्दैछ।

अगष्ट ३१ सम्म चल्ने खेलाडी ट्रान्सफर विन्डोमा बार्सिलोनाले पोग्बामाथि रुची दखाएको खबर बाहिर आएको छ। पछिल्लो केहि दिनमा इटालियन क्लब युभेन्ट्स समेत पोग्बाको लागि परश्रिम गरिरहेको खबर बाहिरिएको हो। यद्दपी युनाइटेड भने पोग्बालाई छाड्ने मनसायमा नरहेको मौरिन्होले बताए। शुक्रबारको खेलमा पोग्बा नखेल्ने संकेत समेत मौरिन्होको थियो।

पत्रकार सम्मेलनमा मौरिन्होले भने, ‘पोग्बा युनाईटेडमा रहन खुसि र गौरवान्वित छन् । सोमबार, मंगलवार र बुधवार उनले धेरै कडा अभ्यास गरे। उनी एक त्यस्ता खेलाडीहुन् जसको शारीरिक र मानसिक तयारीको म धेरै चर्चा गर्छु।’

लिसेस्टर विरुद्धको खेलका बिषयमा बोल्दै उनले थपे, ‘ हामी आफुसंग भएको सबै थोक खेलमा सुम्पने छौं र हेर्ने छौँ यदि १० मिनेट, २० मिनेट वा आधा घण्टामा खेल आफ्नो पक्षमा पर्न सक्छौं भनेर। ’

यस पटकको ट्रान्सफर विन्डोबाट एक मध्य पंक्तिका डिफेन्डर भित्राउन चुकेको युनाइटेडका प्रशिक्षक यसबाट चिन्तित छन्। युनाइटेडले एट्लेटिको म्याड्रिडबाट डिएगो गोडीन लिने प्रयास गरेपनि सो प्रयास असफल बनेको थियो।