पेरिस (एजेन्सी)– विश्व कप जितेयता पहिलो पटक क्लब फर्केका फ्रान्सेली फुटबल टोलीका आफ्ना तीन खेलाडीलाई पेरिस सेन्ट जर्मेन (पिएसजी) भव्य स्वागत गरेको छ । स्ट्राइकर केलियन एमबाप्पे, रक्षक प्रिस्नेल किमपेन्बे र गोलकिपर अल्फोन्से अरियोला रसिया विश्व कप जित्दा फ्रान्सेली टोलीका सदस्य थिए ।

क्लब फर्कदा उनीहरुलाई रेड कार्पेटसहितको स्वागत गरिएको थियो । फ्रान्सको झन्डा फहराउनुका साथै राष्ट्रिय गान पनि बजाइएको थियो । टोलीका अन्य सदस्य केहि अघि प्रशिक्षणमा फर्केपनि विश्व कपमा सहभागी खेलाडीलाई भने क्लबले केहि लामो छुट्टी थिएको थियो । जुलाई १५ मा मस्कोमा क्रोएसियालाई हराउँदै फ्रान्सले दोस्रो पटक विश्व कप जितेको थियो ।

पिएसजी एकेडेमीका सदस्यले पनि आफ्ना स्टार खेलाडीलाई स्वागत गरेका थिए । १९ वर्षे एमबाप्ले रसियामा चम्केका खेलाडी मध्ये एक हुन् । उनी प्रतियोगिता युवा खेलाडीबाट पनि सम्मानित भएका थिए । विश्व कपमा उनले ४ गोल गरेका थिए । क्रोएसियालाई फाइनलमा ४–२ ले हराउँदा एमबाप्पेले १ गोल गरेका थिए ।

अन्तिम १६ को खेलमा फ्रान्सले अर्जेन्टिनालाई ४–३ ले हराउँदा एमबाप्पेले २ गोल गरेका थिए । रसिया विश्व कपमा त्यसलाई सम्झनालायक मध्ये एक खेलका रुपमा लिइएको छ । २२ वर्षे सेन्टर हाफ किमपेन्बेले भने विश्व कपमा एक मात्र खेल खेलेका थिए ।

उनी सम्मिलित समूह चरणको अन्तिम खेलमा फ्रान्सले डेनमार्कसँग गोलरहित बराबरी खेलेको थियो । टोलीका तेस्रो रोजाइका गोलकिपर आरियोलाले भने विश्व कपमा कुनै खेल खेल्न पाएनन् ।

विश्व कपपछिको छुट्टी सकेर टोलीमा फर्केका उनीहरु प्रशिक्षणमा जुट्नेछन् र यहि साताबाट सुरु हुने लिग १ का लागि तयार हुने प्रयास गर्नेछन् । पिएसजी लिग वानको साविक विजेता हो । टोलीले आइतबार पहिलो खेल खेल्नेछ । नयाँ प्रशिक्षक थोमस टुचेको पिएसजीका लागि त्यो पहिलो लिग खेल हुनेछ ।