काठमाडौं (हाम्रो खेलकुद)– भुटानमा बिहीबारबाट सुरु हुने यू १५ महिला साफ च्याम्पियनसिपमा नेपालसहित ६ राष्ट्रले प्रतिस्पर्धा गर्दैछन् ।

अभ्यासका क्रममा नेपाली खेलाडी । तस्बिर सौजन्य -एनएसजेएफ

यसपटक नेपालले पहिलो संस्करणमा भन्दा सुधार गर्ने विश्वासका साथ प्रशिक्षक गंगा गुरुङले उपाधि जित्ने आशा व्यक्त गरेकी छन् । यसअघि भन्दा राम्रो तयारी भएकै कारण उपाधि जित्ने आशा गरिएको प्रशिक्षक गुरुङको भनाई छ । नेपालको समूहमा बंगलादेश र पाकिस्तान रहेका छन् । पाकिस्तान साविक विजेता टोली हो ।

‘नियमित अभ्यासले टोलीको मनोबल छ । त्यसैले उत्कृष्ट सुरुवात गर्ने विश्वास छ,’ प्रशिक्षक गुरुङले बुधबार आयोजित प्रि म्याचकन्फ्रेन्समा भनिन्,‘ बंगलादेश पाकिस्तान दुवै बलिया छन् । जित हार स्वभाविक हो । तर हामी यसपटक उच्च प्रदर्शन गर्नेमा आशावादी छौं । ’

पहिलो संस्करणमा नेपाल आयोजक समेत रहेको बंगलादेशसँग ६–० ले र भारतसँग १०–० ले पराजित भएको थियो । अर्को खेलमा भुटानसँग बराबरी खेलको थियो ।

नेपाली टोलीकी कप्तान प्रिति राईले प्रतियोगिताका लागि एक्सपोजर नभएपछि टोलीले शतप्रतिशत दिने बताइन् । नेपालले शनिबार पाकिस्तानसँग खेल्दै प्रतियोगिताको सुरुवात गर्नेछ ।

बंगलादेशका मुख्य प्रशिक्षक गोलोन रोब्बिनले आफ्नो टोलीले सफल सुरुवात गर्ने अपेक्षा राखेको बताए । बंगलादेशकी कप्तान माभी माण्डाले साफका लागि पर्याप्त तयारी गरेकाले विना दबाब खेल्ने बताइन् ।

तीन वर्षपछि फुटबलमा फर्केको उल्लेख गर्दै पाकिस्तानका प्रशिक्षक मोहम्मद रसिदले सक्दो राम्रो खेल्ने प्रयास गर्ने बताए । उनका अनुसार टोलीले पछिल्लो एक महिना प्रशिक्षण गरेको बताए ।

समूह बी मा रहेका भारत, श्रीलंका र भुटानका प्रशिक्षकहरुले उपाधि जित्ने लक्ष्यका साथ प्रतियोगितामा सहभागिता भएको बताएका छन् । बिहीबार सुरु हुने प्रतियोगिताको उद्घाटन खेलमा भारत र श्रीलंकाबीच प्रतिस्पर्धा हुनेछ । अर्को खेल बंगलादेश र पाकिस्तानबीच हुनेछ ।