लन्डन (एजेन्सी) – वैकल्पिक गोलकिपर रोबर्ट ग्रीन नायक बनेपछि इंग्लिस क्लब चेल्सीले प्रि–सिजन अन्र्तगतको इन्टरनेसनल च्याम्पियन कपमा लियोनलाई पराजित गरेको छ । प्रतिस्पर्धात्मक बनेको खेलमा चेल्सीले फ्रेन्च लिग वान क्लब लियोनलाई सडनडेथमा ५–४ ले पराजित गरेको हो ।

घरेलु मैदान स्टामफोर्ड ब्रिजमा मंगलबार राति भएको खेलको निर्धारित समयमा दुवै टिमले गोल गर्न नसकेपछि खेल पेनाल्टी सुटआउटमा पुगेको थियो । पेनाल्टी सुटआउटमा दोस्रो हाफमा मैदान छिरेका चेल्सीका गोलकिपर रोबर्ट ग्रीनले एक पेनाल्टी बचाएका थिए । रोबर्ट ७४ औं मिनेटमा मार्सिनल बुल्काको स्थानमा मैदान छिरेका थिए । निर्णायक पेनाल्टीमा इडेन हाजार्ड चुकेनन् । त्यसअघि दुवै टिमले पाएको सुन्दर मौकालाई सदुपयोग गर्न सकेनन् ।

चेल्सीका पहिलो रोजाईका गोलरक्षक थिवाउट कोर्टुवा स्पेनिस क्लब रियल मड्रिड जाने हल्ला चलिरहँदा रोबर्ट ग्रीनले उच्च प्रदर्शन गरेको हो ।

यससँगै चेल्सीको प्रि–सिजनको अभ्यास खेलहरु सकिएको छ । चेल्सीले प्रि–सिजनमा लियोनमाथिको जितसँगै दुई जित मात्र निकाल्न सक्यो । यसअघि पर्थ ग्लोरीमाथि चेल्सीले १–० को जित निकालेको थियो । त्यसपछि इन्टर मिलान र आर्सनलसँग पेनाल्टी सुटआउटमा तथा कम्युनिटी शिल्ड कपमा म्यानचेस्टर सिटीसँग २–० ले पराजित भएको थियो ।

चेल्सीले हडल्र्सफिल्ड टाउनसँग शनिबार खेल्दै प्रिमियर लिगको शुरुवात गर्नेछ ।