लन्डन (एजेन्सी) – एटलेटिको मड्रिडका गोलरक्षक जान ओब्लकका लागि ८९ मिलियन पाउन्ड तिर्न तयार रहेको बताइएको छ । यदि चेल्सीका थिबाउट कोउर्टोस प्रशिक्षणमा नफर्के चेल्सी ओब्लाकका लागि ८९ मिलियन पाउन्ड तिर्न तयार रहेको बताएका हुन् ।

चेल्सीले ८९ मिलियन खर्च गरे ओब्लाक विश्वका सबैभन्दा महंगा गोलरक्षक बन्नेछन् । यसअघि ब्राजिलियन गोलकिपर एलिसनलाई लिभरपुलले ६५ मिलियन पाउण्डमा अनुबन्ध गरेको थियो । जुन अहिले सम्मकै गोलकिपरका लागि खर्चेको सर्वाधिक रकम हो । २६ बर्षीय थिबाउट यतीखेर रियल मड्रिड जाने तयारी गरिरहेको खुलासा भएको छ । उनी सोमबारसम्म प्रिमियर लिग क्लब चेल्सीको प्रशिक्षणमा फर्केका छैनन् ।

रियलसँग नाम जोडिएका इडेन हाजार्ड भने सोमबारनै प्रशिक्षणमा फर्किएका छन् । रुस विश्वकपमा थिबाउटलाई सर्वश्रेष्ठ गोलकिपर घोषित गरिएको थियो । जहाँ बेल्जियमले तेस्रो स्थानको प्ले–अफमा इंग्लयान्डलाई पराजित गरेको थियो । थिबाउट रियल जान नसके अर्को मड्रिड क्लब एटलेटिको जान सक्ने बताईएको छ । उनले एटलेटिकोमा २०११ देखी २०१४ सम्म ला लिगामा खेलेका थिए । ला लिगाका लागि उनी लोनमा बेल्जियम क्लब गेन्कबाट आएका थिए ।

एटलेटिको मड्रिडमा ला लिगाका चार सिजनका १११ खेल खेलेका थिए । त्यसपछि उनी २०१४ मा चेल्सी आएका थिए । चेल्सीमा रहदै उनले १५४ खेल खेल्दा ५८ क्लिनसिट राखेका छन्  । नयाँ प्रशिक्षक माउरिजियो सारीले उनी क्लबमा रहने नरहने कुनै निश्चित नभएको बताए । ‘अहिले उनी चेल्सीका गोल किपर हुन । मलाई भविष्यको बारेमा थाहा छैन् । यो क्लब र उनीमा निर्भर हुन्छ । तर, मलाई विश्वास छ की उनी हाम्रो क्लबमै रहने छन्’ प्रशिक्षक सारीले भने । चेल्सी आइतबार कम्युनिटी सिल्डमा म्यान्चेस्टर सिटीसँग २–० ले पराजित भएको थियो ।