म्युनिख (एजेन्सी) – इंग्लिस क्लब म्यानचेस्टर युनाइटेडले प्रि–सिजन भ्रमण हारबाट अन्त्य गरेको छ । जर्मन च्याम्पियन बायर्न म्युनिखसँग १–० ले पराजित हुदै युनाइटेडले प्रि–सिजन भ्रमण हारबाट अन्त्य गरेको हो ।

युरोपियन क्लब फुटबल शुरु हुनुअघि क्लबहरु प्रि–सिजनका लागि अमेरिका लगायतका देशहरुको भ्रमणका निस्किएको थियो । प्रि–सिजनको ६ खेलमध्ये युनाइटेडले दुई खेलमा मात्र जित हात पार्न सफल भयो ।

युनाइटेडले एसी मिलान र रियल मड्रिडलाई मात्रै पराजित गर्न सक्दा क्लब अमेरिका र सान जोसे अर्थक्वेकसँग बराबरी खेलेको थियो । इंग्लिस क्लब लिभरपुलसँग भने ४–१ को फराकिलो हार बेहोरेको थियो ।

म्युनिखको घरेलु मैदान एलिनाज एरिनामा आइतबार बिहान भएको खेलमा जेभियर मार्टिनेजको एक मात्र गोल नै युनाइटेडको हारमा पर्याप्त बन्यो । प्रतिस्पर्धात्मक बनेको खेलको ५९ औं मिनेटमा मार्टिनेजले थियागो आलाकान्तराको कर्नरमा गोल गर्न सफल भएका थिए ।

यस खेलमा पउल पोग्वा, रोमेलु लुकाकु, जेसे लिङगार्ड, एस्ले योङ र मराउने फेलियनीलाई प्रशिक्षक जोजे मौरिन्होले विश्राम दिएका थिए ।। नेमान्जा मेटिक र एन्टोनियो भ्यालेन्सिया भने चोटग्रस्त छ ।

चार दिनपछि शुरु हुने इंग्लिस प्रिमियर लिगमा म्यानचेस्टर युनाइटेडले लेस्टर सिटीलाई घरेलु मैदानमा आतिथ्य गर्दैछ ।