काठमाडौं (हाम्रो खेलकुद)– राष्ट्रिय फुटबल खेलाडीले प्राप्त गर्ने भत्तामा बृद्धि भएको छ । अखिल नेपाल फुटबल संघ (एन्फा) ले अन्तर्राष्ट्रिय प्रतियोगितामा भाग लिने दौरानमा उपलब्ध गराउने दैनिक भत्ता अबबाट २१ अमेरिकी डलर दिने एन्फाका अध्यक्ष कर्मा छिरिङ शेर्पाले जानकारी दिएका छन् । यसअघिको भत्तामा यो ५० प्रतिशतले बृद्धि हो ।

यसअघि एन्फाले हरेक खेलाडीलाई दैनिक भत्ताका रुपमा १४ अमेरिकी डलर उपलब्ध गराउँदै आएको थियो । अहिले तत्कालका लागि पुरुष टोलीलाई यो उपलब्ध गराउने अध्यक्ष शेर्पाले बताए । ‘समानाकुल भत्ता बृद्धि गर्नै पर्ने भएकाले हामीले बढाएक हौं ,’ अध्यक्ष शेर्पाले भने, ‘यो पर्याप्त होइन । भविष्यमा बढ्दै जानेछ ।’

राष्ट्रिय टोलीका सदस्यले जनही मासिक १५ हजार रुपैयाँ प्राप्त गर्दै आएका छन् । भत्ता भने अन्तर्राष्ट्रिय प्रतियोगिता वा मैत्रीपूर्ण खेलका दौरान मात्र प्राप्त गर्नेछन् । महिला राष्ट्रिय टोलीका खेलाडीका लागि भत्ता बढ्ने विषयमा भने छलफल हुने पनि अध्यक्ष शेर्पाले जानकारी दिए । ‘अहिलेका लागि पुरुष टोलीको भत्तामा बृद्धि गरेका हौं ,’ उनले भने, ‘महिलाको हकमा के गर्ने भन्ने विषयमा हामी छलफलपछि एउटा निर्णयमा पुग्ने छौं ।’

अर्को महिना इन्डोनेसियामा हुने एसियाली खेलकुद र बंगलादेशमा हुने साफ च्याम्पियनसिपको अन्तिम तयारीका लागि अहिले नेपाली टोली थाइल्यान्डमा रहेको छ । थाइल्यान्डमा २ अभ्यास खेलपछि नेपाली यू २३ टोली इन्डोनेसिया जानेछ ।

भदौ २ गते एसियाडको औपचारिक सुरुवात भएपनि फुटबल भने त्यसअघि नै सुरु हुनेछ । राष्ट्रियले भाग लिने साफ च्याम्पियनसिप भने भदौ १९ गतेबाट बंगलादेशमा सुरु हुनेछ । नेपालले पाकिस्तानको सामना गर्दै साफ च्याम्पियनसिपको सुरुवात गर्नेछ । नेपालले अहिले सम्म साफ च्याम्पियनसिप जित्न सकेको छैन ।