काठमाडौं (हाम्रो खेलकुद)– अखिल नेपाल फुटबल संघ (एन्फा) ले लिखित स्पष्टिकरण माग गरेका ५ खेलाडीलाई तत्काल कुनै कारवाही नगर्ने भएको छ । गत साता मादक पदार्थ सेवन गरि हो हल्ला गरेको भन्ने समाचार सार्वजनिक भएपछि एन्फाले त्यसमा संलग्न भनिएका खेलाडीलाई मौखिक र त्यसपछि ७२ घन्टा भित्र लिखित जवाफ पेश गर्न निर्देशन दिएको थियो ।

पाँच खेलाडीमा विमल घर्तीमगर, अजन्ज विष्ट, विशाल राई, हेमन्त थापा मगर र छिरिङ गुरुङ शेर्पा । पाँचै खेलाडी, टोलीका व्यवस्थापक र होस्टल वार्डेनले स्पष्टिकरण बुझाइसकेको र सुरक्षा हेर्ने गरुड सेक्युरिटीको स्पष्टिकरण प्राप्त भएपछि थप छानविन अघि बढ्ने भएकोले खेलाडीलाई तत्काल कारवाही नहुने एन्फा प्रवक्ता किरण राईले हाम्रो खेलकुदलाई जानकारी दिए ।

‘छानविनको क्रममै छौं । खेलाडी, व्यवस्थापक र होस्टल वार्डेनको स्पष्टिकरण प्राप्त भएको छ । ती सबै बन्द खाममा छन्,’ उनले भने,‘अब सक्युरिटीको स्पष्टिकरण आएपछि थप छलफल र छानविनका लागि अनुशासन समितिलाई जिम्मा दिइनेछ । समितिको सिफारिसमा आवश्यक निर्णय लिनेछौं । खेलाडीको तत्कालको भ्रमण भने रोकिने छैन ।’

एसियाली खेलकुद र साफ च्याम्पियनसिपको तयारीका लागि शुक्रबार टोली थाइल्यान्ड प्रस्थान गर्दा ५ जना टोलीका साथ जाने भएका छन् । एन्फा अध्यक्ष कर्मा छिरिङ र अन्य पदाधिकारीले ५ खेलाडीसँग मौखिक स्पिष्टिकरण लिएपछि लिखित स्पिष्टिकरण पनि लिने निर्णय लिएको थियो ।

एन्फाले खेलाडी, टोलीका व्यवस्थापक बाबुकाजी बस्नेत, होस्टेल वार्डेन टक्कर थापालाई ३ दिन र सेक्युरिटी कम्पनी गुरुडलाई ७ दिन भित्र लिखित जवाफ पेश गर्न निर्देशन दिएको थियो ।