डबलिन (एजेन्सी) – अन्तर्राष्ट्रिय च्याम्पियन्स कपअन्तर्गत दुई प्रिमियर लिग टोली आर्सनल र चेल्सीको भिडन्तमा आर्सनलले जित हात पार्न सफल भएको छ । नियमित समय १-१ को बराबरीमा सकिएपछि आर्सनलले खेल पेनाल्टीमा ६-५ ले जितेको हो ।

चेल्सीका लागि डिफेन्डर एन्टोनियो रुडिगरले खेलको पाँचौं मिनेटमा हेडरमार्फत गोल गरेका थिए । खेलको १५ औं मिनेटमा आर्सनलका हेक्टर बेल्लेरिनको फाउलमा चेल्सीले पेनाल्टी पनि पाएको थियो ।

तर सो पेनाल्टीमा एल्भारो मोराटाको प्रहार पिटर चेकले बचाऊ गरे । दोस्रो हाफको इन्जुरी समयमा आर्सनल खेलमा फर्केको हो । रिस नेल्सनको पासमा एलेक्जान्डर लाकाजेटले गोल गर्दै खेललाई अन्तिम समयमा पेनाल्टीतर्फ मोडेका थिए ।

आर्सनल र चेल्सीका पहिला ५-५ खेलाडी सबैले आफ्नो पेनाल्टी परिणत गरे । आर्सनलका लागि लाकाजेट, माटियो गुन्डोजी, एन्स्ली मेटलेन्ड-नाइल्स, मेसुट ओजिल र रिस नेल्सनले आफ्नो पेनाल्टी परिणत गरे भने चेल्सीका ड्यानी ड्रिंकवाटर, ट्यामी अब्राहम, भिक्टर मोजेज, एमेर्सन र लुकास पियाजोन चुकेनन् ।

त्यसपछि खेल सडन-डेथमा पुगेको थियो । चेल्सीका रुबेन लफ्टस-चिकको पेनाल्टी चेकले रोकेपछि आर्सनलका एलेक्स इवोबिले आफ्नो प्रहार परिणत गर्दै आर्सनललाई जित दिलाए ।

११ अगष्टमा प्रिमियर लिग सिजन सुरु हुन अघि आर्सनलले श​निबार​ लाजियोसँग​ खेल्ने छ​,  चेल्सीले लियोनसँग अगष्ट ८ मा आफ्नो अन्तिम मैत्रीपूर्ण खेल खेल्ने छ । अन्तर्राष्ट्रिय च्याम्पियन्स कपअन्तर्गत अन्य खेलमा लियोनले बेनिफिकालाई ३-२ ले पराजित पनि गर्‍यो ।