साग फुटबलको सेमी फाइनलमा माल्दिभ्सलाई ४–३ गोलको सनसनीपूर्ण जित निकाल्दै नेपाली पुरुष फुटबल टोली १२ औं दक्षिण एसियाली खेलकुद (साग) फुटबलको फाइनलमा प्रवेश गरेको छ ।
गुवाहाटीस्थित इन्दिरा गान्डी स्टेडिममा शनिबार साँझ भएको प्रतिस्पर्धात्मक खेलमा नेपालले बलियो प्रतिद्वन्द्वी माल्दिभ्सलाई हराउन अतिरिक्त समय लागेको थियो । निर्धारित ९० मिनेटमा २–२ गोलको बराबरीमा सकिएको खेलको अतिरिक्त समयमा नेपालले दुई र माल्दिभ्सले एक गोल गरेको थियो ।
साग फुटबलमा १७ वर्षपछि नेपाल फाइनलमा पुगेको हो । नेपाले यसअघि सन् १९८४ र १९९३ को साग फुटबलमा स्वर्ण पदक जितेको थियो । फाइनलमा उपाधिका लागि नेपालले चिरपरिचित प्रतिद्वन्द्वी भारतसँग प्रतिस्पर्धा गर्नेछ । शनिबार नै भएको पहिलो सेमिफाइनलमा भारतले बंगलादेशलाई ३–० गोलले पराजित गर्दै फाइनलमा पुगेको हो ।
माल्दिभ्सलाई हराउने क्रममा नवयुग श्रेष्ठले ह्याट्रिक गरे । नवयुगले खेलको ३६ औं, एकसय १७ औं र एकसयौं २० औं मिनेटमा गोल गरेका थिए । यसअघि अन्जन विष्टले १५ औं मिनेटमा खाता खोलेका थिए । माल्दिभ्सका लागि मोहमद हम्जाले ५२ औं, अहमेद नासिदले ८६ औं र हसन नियाजले एकसय १४ औं मिनेटमा गोल गरे ।
अन्जनले विमल घर्तीमगरले बाँया साइडबाट दिएको छोटो पासमा अनमार्क जाली चुमाएका थिए । खेलको ३६ औं मिनेटमा टोलीका लागि दोस्रो गरेका नवयुगले अन्तिम समयमा चमत्कारिक गोल गर्दै नेपालको जित सुनिश्चित पारेका थिए ।
हारको मुखमा पुगेको नेपालले अतिरिक्त समयको अन्तिम मिनेटमा निर्णायक गोलगरेपछि प्यारापिटमा नेपाली सर्मथक खुशीले कराएका थिए ।
बंगबन्धु गोल्डकपमा भुटानबिरुद्ध ह्याट्रिक गरेका नवयुगको अन्तर्राष्ट्रिय स्पर्धामा यो तेस्रो ह्याट्रिक हो ।नेपाल दोस्रो हाफमा भने लय गुमाएको थियो । सुरुआती अग्रतापछि अत्तालिएको नेपालबिरुद्ध दोस्रो हाफमा माल्दिभ्स हावी बन्यो । खेलमा फर्किएको माल्दिभ्सले लगातार नेपाललाई दबाबमा राखेको थियो ।
यसअघि ६६ आँैं मिनेटमा पुगेर नेपाल १० खेलाडीमा समेटिएको थियो ।१० खेलाडीमा झरेपछि रक्षात्मक रणनीति बनाएको नेपालबिरुद्ध माल्दिभ्स झनै हावी देखिएको थियो ।
खेलपछि नेपालका प्रशिक्षक राजुकाजी शाक्यले खेलाडीले उत्कृष्ट फुटबल खेलेको बताए । ‘यो भन्दा राम्रो फुटबल खेल्न सकिन्नँ । दोस्रो हाफमा हामीले केही कजोरीनै गरेका हौं । खेलाडी अत्तालिएका कारण काउन्टर प्रहारमा गोल खायौँ’, प्रशिक्षक राजुकाजी शाक्यले भने, ‘त्यसपछि दबाबपूर्ण खेलका कारण रातोकार्ड हुनु अर्को खतारा थियो । तरपनि खेलाडीले आफू गोर्खाली भएको प्रमाणित गरेर देखाए । फाइनलमा हामी भारतलाई हराउन यो भन्दा राम्रो खेल्छाँै ।’,
टोलीका सहायक कप्तान विक्रम लामाले एउटा टोलीको रुपमा सबैले उत्कृष्ट खेले खेलेको प्रतिक्रिया दिए ।
नेपालले सागमा पुरुष फुटबलतर्फ सन् १९९३ मा ढाकामा स्वर्ण पदक जितेको थियो । त्यतिबेला शाक्य टोलीको कप्तान थिए ।
सन् १९९९ को साग फुटबलमा नेपालले रजत जित्दा उनी टोलीको सहायक प्रशिक्षक थिए ।
