महिला लिगमा आर्मीको तेस्रो जित

ललितपुर (हाम्रो खेलकुद)– त्रिभुवन आर्मी क्लबले उपराष्ट्रपति कप महिला राष्ट्रिय लिगमा उच्च प्रदर्शनलाई जारी राख्ने क्रममा लगातार तस्रो जित हासिल गरेको छ । आर्मीले आइतबार रौतहटलाई ३–१ ले हराउँदै लिग जित्ने सम्भावनलाई बलियो बनाएको छ । आर्मीले यसअघि नेपाल पुलिस क्लब र काठमाडौंलाई हराएको थियो ।

आर्मीलाई जित दिलाउन शर्मिला थापाले २ र दीपा राईले १ गोल गरिन् । शर्मिलाले नवौं र १२ औं मिनेटमा गोल गरिन् । दीपाले ४५ औं मिनेटमा गोल थपेकी थिइन् । रौतहटका लागि रश्मीकुमारी घिसिङले ६८ औं मिनेटमा गोल फर्काएकी थिइन् ।

तीन जितपछि आर्मीको ९ अंक पुगेको छ । लगातार २ खेल जितेको नेपाल एपिएफ क्लबले आइतबार नै नेपाल पुलिससँग प्रतिस्पर्धा गरिरहेको छ । एपिएफले पुलिसलाई हराएमा आर्मी र एपिएफबीचको खेल निर्णायक हुनेछ ।