टुरिन (एजेन्सी)– रियल म्याड्रिडमा जस्तै युभेन्ट्समा पनि क्रिस्टियानो रोनाल्डो खुला रुपमा गोल गर्ने क्रमलाई निरन्तरता दिने प्रशिक्षक मासिमिलियानो अलिग्रीले विश्वास लिएका छन् । यद्दपी युभेन्ट्समा उनी कुन पोसिजनबाट खेल्ने छन् भन्ने अझै तय भएको छैन ।

रियलमा झन्डै एक दशक बिताउने क्रममा रोनाल्डो सम्मिलित टोलीले पछिल्लो ५ वर्षमा स्पेनिस कपका साथै ४ पटक च्याम्पियन्स लिग उपाधि जितेको थियो । रसिया विश्व कपपछि रोनाल्डोले रियल छाडेर युभेन्ट्स जाने निर्णय गरेका थिए । पोर्चुगिज कप्तान रोनाल्डो रियलका सफल खेलाडी हुन् । पछिल्ला सिजन मात्र उनले सबै खाले प्रतियोगितामा ४४ खेलमा ४४ गोल गरेका थिए ।

उनका नयाँ प्रशिक्षक अलिग्रीले रोनाल्डोले कुन पोजिसनबाट खेल्ने पक्का नभएपनि युरोपियन च्याम्पियन टोलीमा जस्तै पोजिसनलाई निरन्तरता दिने अपेक्षा गरेका छन् । रियलमा रहँदा जस्तै उनले धेरै गोल गर्नेमा पनि प्रशिक्षक विश्वस्त छन् । ‘रोनाल्डो त्यहिबाट खेल्ने छन् , फ्रन्ट थर्ड जहाँ उनले सधै खेल्दै आएका छन्,’ प्रशिक्षक अलिग्रीले भने, ‘र उनले त्यसरी नै गोल गर्ने छन्, जसरी यसअघि गर्दै आएका छन् ।’

युभेन्ट्सले पछिल्लो सात वर्ष लगातार सिरी ए उपाधि जितेको छ । रोनाल्डो जस्ता स्टार खेलाडी विना पनि युभेन्ट्सले घरेलु फुटबलमा उच्च प्रदर्शन गरिरहेको छ । तर, च्याम्पियन्स लिग उपाधि जित्ने सम्भावना बलियो बनाउनका लागि भने रोनाल्डो जस्ता खोलडीको जरुरी हुन्छ ।

यसअघि दुई पटक फाइनल पुगेपछि युभेन्ट्स च्याम्पियन्स लिग जित्न असफल रहँदै आएको छ । रियलमा मात्र ४ र खेल जीवनमा ५ पटक च्याम्पियन्स लिग जितिसकेका रोनाल्डोबाट युभेन्ट्सले त्यस्तै प्रदर्शनको अपेक्षा पक्कै गरेको हुनुपर्दछ ।