मोनाको (एजेन्सी) – रसियन राष्ट्रिय टिम तथा सिएसके मस्कोको एट्याकर अलिकसन्डर गोलोभिन फ्रेन्च लिग वान क्लब एस मोनाकोमा अनुबन्धित भएका छन् । इंग्लिस क्लब चेल्सीको नजरमा रहेका गोलोभिनलाई मोनाकोले पाँच वर्षको लागि क्लबमा शुक्रबार अनुबन्ध गरेको हो ।

उनको अनुबन्ध रकम नखुलाइएपनि उनी २७ मिलियन पाउन्डमा क्लबमा अनुबन्ध भएको बुझिएको छ । मोनाकोको अफिसियल साइटले गोलोभिनलाई अनुबन्ध गरिएको र यसबारे छिट्टै सार्वजनिक गरिने बताएको छ । उनी २०२३ सम्म मोनाकोमा रहनेछ । क्लबले जारी गरेको विज्ञप्तिमा भनिएको छ ।

‘एएस मोनाकोले गोलोभिनलाई गोलोभिनलाई सिएसके मस्कोबाट पाँच वर्षका लागि अनुबन्ध गर्न पाएकोमा खुशी छौं ।’ मोनाकोमा अनुबन्ध भएसँगै गोलोभिनले यो आफ्नो लागि नयाँ र साहसिक यात्रा रहेको बताए ।

‘मेरो केही लक्ष्यमध्ये ठुला क्लबबाट खेल्ने एक महत्वाकाङ्क्षा पुरा हुने भएको छ । मैलै अब के गर्ने र कसरी अघि बढ्ने भन्ने सोचिरहेको छु । जहाँ मैले नयाँ साथीहरु र म्यानेजरसँग खेल्ने मौका पाएको छु ।’ गोलोभिनले भने ।

२२ वर्षीय गोलोभिनले रसिया विश्वकपमा उच्च प्रदर्शन गरेपछि उनलाई चेल्सीले अनुबन्ध गर्ने प्रयास गरेको थियो । रसिया विश्वकपमा चार खेलमा गोलोभिनले एक गर्नुका साथै दुई गोलको लागि अवसर सिर्जना गरेका थिए । अघिल्लो सिजन रसियन लिगमा मस्कोबाट २६ खेल खेल्दा गोलोभिनले पाँच गोल गर्दै ३ गोलको लागि सहायता गरेका थिए ।