काठमाडौं (हाम्रो खेलकुद) – राजधानीमा जारी उप राष्ट्रपति कप महिला राष्ट्रिय लिगमा विभागीय त्रिभुवन आर्मी क्लबले लगातार दोस्रो जित निकालेको छ ।

सातदोबाटोस्थित एन्फा कम्प्लेक्सको खेल मैदानमा शुक्रबार भएको खेलमा आर्मीले काठमाडौंमाथि ८–० को सहज जित निकाल्दै लिगमा लगातार दोस्रो जित निकालेको हो ।

आर्मीको फराकिलो जितमा दीपा राईले ह्याट्रिक पुरा गरिन् । कृष्णा बस्नेतलले दुई तथा बिमला विक, इन्दिरा राई र कविता धिमालले समान १ गोल गरिन् ।

२४ औं मिनेटमा बिमला विकेको गोलबाट अग्रता बनाएको आर्मीले ३४ औं मिनेटमा कृष्णा बस्नेतको गोलबाट अग्रता दोब्बर बनायो । कृष्णाले ४३ औं मिकनेटमा व्यक्तिगत दोस्रो तथा टिमका लागि तेस्रो गोल गरिन् ।

४४ औं मिनेटमा दीपा राईले गोल गर्र्दै आर्मीले खेललाई ४–० ले आफ्नो नियन्त्रणमा राख्न सफल भइन् । इन्जुरी समयमा इन्दिरा राईले गोल गरेपछि आर्मीले पहिलो हाफमा ५–० को अग्रता बनायो ।

दोस्रो हाफमा पनि आर्मीले थप तीन गोल गर्न सफल भयो । ५३ औं मिनेटमा दीपाले गोल गरेपछि आर्मी ६–० ले अघि बढ्यो । ५६ औं मिनेटमा अर्काे गोल गर्दे दीपाले खेलमा ह्याट्रिक पुरा गरिन् । ८३ औं मिनेटमा कविता धिमालले गोल गरेपछि आर्मीले ८–० को फराकिलो जित निकाल्न सफल भयो ।

आर्मीको यो लिगमा लगातार दोस्रो जित हो । यसअघि आर्मीले पहिलो खेलमा विभागीय नेपाल पुलिस क्लबलाई १–० ले पराजित गरेको थियो ।

दोस्रो जितसँगै आर्मी लिगको दोस्रो स्थानमा उक्लिएको छ । आर्मीको दुई खेलबाट ६ अंक पुगेको छ । आर्मी गोलअन्तरमा एपिएफभन्दा पछि छ । एपिएफले आजै रौतहटलाई ७–० ले पराजित गरेको थियो ।