काठमाडौं (हाम्रो खेलकुद) – अर्को महिना इन्डोनेसियामा हुने १८ औं एसियाली खेलकुद (एसियाड) को पुरुष फुटबलमा नेपाल समूह ‘डी’ मै यथावत रहेको छ ।

एसियाली फुटबल महासंघ (एएफसी) बुधबार सार्वजनिक गरेको नया टाइसिट ‘ड्र’ अनुसार नेपाल समूह ‘डी मै यथावत रहेको हो । नेपाल रहेको समूहमा एसियाली पावरहाउस जापानसँगै भियतनाम र पाकिस्तान छन् ।

एसियाडमा प्यालेस्टाइन र युनाइटेड अरब इमिरेट्स (युएई) छुटेका कारण एसियाड आयोजक समितिले पुन टाइसिट ‘ड्र’ सार्वजनिक गरेको थियो ।

सार्वजनिक भएको ‘ड्र’ अनुसार समूह ‘ए’ मा इन्डोनेसिया, हङकङ, लाओस, चाइनिज ताइपे र प्यालेस्टाइन रहेका छन् । समूह ‘बी’ मा थाइल्यान्ड, उज्वेकिस्तान, बंगलादेश र कबतार रहेका छन् ।

यस्तै समूह ‘सी’ मा इराक, चीन, टिमोर सिस्टे र सिरिया रहेका छन् । समूह ‘ईं’ मा कोरिया रिपब्लिक, किर्गिस्तान, मलेसिया, बहराइन र युएईं रहेका छन् । यस्तै समूह ‘एफ’ मा साउदी अरेबिया, उत्तर कोरिया, इरान र म्यानमार रहेका छिन् ।

एसियाडमा यु–२३ का खेलाडीहरु हुनेछ । ओलम्पिकको नियमअनुसार एसियाडमा सिनियर ३ खेलाडी राख्न पाउने प्रावधान छ ।
अखिल नेपाल फुटबल संघ (एन्फा) ले टोलीका मुख्य प्रशिक्षक जापानी ग्यातुको कोजीको सिफारिसमा एसियाडका लागि २० सदस्यीय टिमको घोषणा गर्दै सातदोबाटोस्थित एन्फा कम्प्लेक्सको खेल मैदानमा प्रशिक्षण गरिरहेको छ ।

एसियाडमा सिनियर खेलाडीको रुपमा गोलरक्षक किरण चेम्जोङ, मिडफिल्डर रोहित चन्द र विशाल राईलाई छनोट गरेको छ । विशाल भरत खवासको स्थानमा आएका हुन् । भरतले ग्रोइन इन्जुरीका कारण एसियाड गुमाउने भएपछि उनको स्थानमा कोजीले विशाललाई मौका दिएका हुन् ।