पेरिस (एजेन्सी) – रुस विश्वकप २०१८ बाट युवा स्टारको छवि बनाएका फ्रान्स तथा पिएसजीका फरवार्ड किलियन एम्बाप्पेले आफ्नो राष्ट्रिय टिमका सहकर्मी एनगोलो कान्टेलाई अनुबन्ध गर्न पिएसजीलाई आग्रह गरेका छन् ।

२७ बर्षीय मिडफिल्डर कान्टे हाल चेल्सीबाट प्रिमियर लिग खेल्दै छन् । कान्टेलाई भित्र्याउने एम्बाप्पेको सल्लाहप्रति पिएसजी सकरात्मक रहेको अन्तराष्ट्रिय सञ्चार माध्यमले जनाएका छन् ।

विश्वकपको उपाधि दौडमा मिडफिल्डर कान्टेले निकै नै महत्वपुर्ण भुमिका खेलेको थिए । एम्बाप्पेको सल्लाह अनुरुप फ्रान्सेली क्लबले यस सिजनको ट्रान्सफर विन्डोमा कान्टेलाई भित्राउन प्राथमिकतामा राखेको बताइएको छ ।

लेस्टर सिटीबाट आफ्नो पहिलो सिजनमै कान्टेले अप्रत्याशित रुपमा प्रिमियर लिगको उपाधि जितेका थिए । त्यसपश्चात उनले चेल्सीबाट पनि पहिलो सिजनमै लिगको उपाधि जिते भने फ्रान्सलाई विश्वविजेता बनाउन अघी युरोकप २०१६ मा उपविजेता बनाउन कान्टेको ठुलो योग्दान थियो ।

अहिलेका सबैभन्दा अब्बल रक्षात्मक मिडफिल्डरको उपनाम कमाएका कान्टेलाई पिएसजीले १ सय मिलियन पाउण्डमा भित्र्याउन सक्ने बताईएको छ । चेल्सी कान्टे छोड्ने पक्षमा भने छैन ।

चेल्सीका दुई स्टार एडेन हाजार्ड र विलियनलाई क्रमश: रियल म्याड्रिड र बार्सिलोनाले भित्राउन हरप्रयास गरिरहेका छन् । पिएसजीले गत सिजन फ्रान्सेली लिग १ जितेको थियो भने चेल्सी प्रिमियर लिगमा पाँचौ स्थानमा रहेको थियो ।