काठमाडौं (हाम्रो खेलकुद)– उपराष्ट्रपति कप महिला राष्ट्रिय लिगको दोस्रो खेलमा रौतहटले सहज जित हासिल गरेको छ । रुश्मीकुमारी घिसिङले ह्याट्रिक गरेको खेलमा काठमाडौंलाई ४–० ले हराउँदै रौतहटले जितबाट लिगको यात्रा थालेको हो ।

दोस्रो हाफमा ९ मिनेट भित्र रश्मीले ह्याट्रिक पुरा गरेपछि रौतहटको जित सहज बनेको थियो । अर्को गोल मनीषा राउतले गरिन् । एन्फा कम्प्लेक्स सातदोबाटोमा सोमबार भएको सोमबारको उद्घाटन खेलाम त्रिभुवन आर्मी क्लबले नेपाल पुलिस क्लबलाई १–० ले हराएको थियो । आर्मीका लागि शर्मिाला थापाले गोल गरेकी थिइन् ।

दोस्रो खेलको पहिलो हाफ गोलरहित बराबरीमा टुंगिएको थियो । ५० औं मिनेटमा गोलको खाता खोलेकी रश्मीले ५९ औं मिनेटमा ह्याट्रिक पुरा गरेकी थिइन् । उनले दोस्रो गोल ५६ औं मिनेटमा गरिन् । मनीषाले ६८ औं मिनेटमा गोल गरेकी थिइन् ।

अखिल नेपाल फुटबल संघ (एन्फा) को आयोजनामा सुरु भएको लिगमा तीन विभागिय टोलीसहित ५ टोलीको सहभागिता रहेको छ । जिल्ला राष्ट्रिय प्रतियोगितामा विजयी हुँदै रौतहट र काठमाडौंले लिगमा स्थान बनाएका थिए । राउन्ड रोविन लिगको आधारमा लिग साउन १५ गते सम्म चल्नेछ ।

 

लिगको प्रदर्शनका आधारमा महिला साफ च्याम्पियनसिपको लागि खेलाडी छनोटको रुपमा हेरिएको छ । लिगको विजेताले २ लाख, दोस्रो हुने टोलीले १ लाख र तेस्रो हुने टोलीले ५० हजार रुपैयाँ प्राप्त गर्नेछ । लिगको उत्कृष्ट महिला खेलाडीले जनही २५ हजार पाउनेछ ।

व्यक्तिगत विधातर्फका गोलकिपर, डिफेन्डर, मिडफिल्ड, फरवार्ड र प्रशिक्षकले समान १० हजार प्राप्त गर्ने एन्फाले जनाएको छ लिगको तयारीका लागि एन्फाले सहभागी टिमलाई ५० हजार उपलब्ध गराउने बताएको छ । राष्ट्रिय खेदकुद परिषद्का सदस्य सचिव केशवकुमार विष्टले प्रतियोगिताको उद्घाटन गरेका थिए ।