काठमाडौं (हाम्रो खेलकुद)– विभागिय टोली त्रिभुवन आर्मी क्लबले उप राष्ट्रपति कप महिला राष्ट्रिय लिग फुटबलमा विजयी सुरुवात गरेको छ । एन्फा कम्प्लेक्स सातदोबाटोमा सोमबार भएको उद्घाटन खेलमा अर्को विभागिय टोली नेपाल पुलिस क्लबलाई १–० ले हराउँदै आर्मी विजयी सुरुवात गरेको हो ।

बल नियन्त्रणको प्रयासमा आर्मीकी शर्मिला थापा । उनकै गोलमा आर्मी विजयी भएको थियो । तस्बिर – विवेक सुवेदी /हाम्रो खेलकुद

खेल सकिन ८ मिनेट बाँकी रहँदा शर्मिला थापाले गरेको गोल नै खेलको निर्णायक बनेको थियो । अखिल नेपाल फुटबल संघ (एन्फा) को आयोजनामा सुरु भएको लिगमा तीन विभागिय टोलीसहित ५ टोलीको सहभागिता रहेको छ । जिल्ला राष्ट्रिय प्रतियोगितामा विजयी हुँदै रौतहट र काठमाडौंले लिगमा स्थान बनाएका थिए ।

राउन्ड रोविन लिगको आधारमा लिग साउन १५ गते सम्म चल्नेछ । लिगको प्रदर्शनका आधारमा महिला साफ च्याम्पियनसिपको लागि खेलाडी छनोटको रुपमा हेरिएको छ । लिगको विजेताले २ लाख, दोस्रो हुने टोलीले १ लाख र तेस्रो हुने टोलीले ५० हजार रुपैयाँ प्राप्त गर्नेछ ।

लिगको उत्कृष्ट महिला खेलाडीले जनही २५ हजार पाउनेछ । व्यक्तिगत विधातर्फका गोलकिपर, डिफेन्डर, मिडफिल्ड, फरवार्ड र प्रशिक्षकले समान १० हजार प्राप्त गर्ने एन्फाले जनाएको छ लिगको तयारीका लागि एन्फाले सहभागी टिमलाई ५० हजार उपलब्ध गराउने बताएको छ ।

सोमबार नै रौतहट र काठमाडौंबीच प्रतिस्पर्धा भइरहेको छ ।राष्ट्रिय खेदकुद परिषद्का सदस्य सचिव केशवकुमार विष्टले प्रतियोगिताको उद्घाटन गरेका थिए ।