काठमाडौं (हाम्रो खेलकुद)– विश्वकप २०१८ समाप्तीसँगै यसको चर्चा पनि धेरै हदसम्म सेलाइसकेको छ । एक प्रकारले विश्वकपको ‘ह्यान्ग ओभर’ अब समाप्त हुने विन्दुमा छ । तर पर्खौ, फुटबल पारखीहरूले नेयमारको भित्री कुरा नसुनेर कसरी मुक्त हुन पाउँछन् र ? यसपल्टको विश्वकपका एक चर्चित अनुहारमा पर्छन्, यी ब्राजिली खेलाडी नेयमार । धेरैका लागि उनी यस विश्वकपका नायक हुन सक्छन् । अथवा धेरैका लागि उनी खलनायक पनि हुन् ।

विश्वकप सकेको एक साता बितिसकेपछि पहिलो पल्ट उनले आफ्नो मुख खोलेका छन्, क्लब फुटबल खेल्न युरोप फर्केयता । पेरिस सेन्ट जर्मेन ९पीएसजी० का लागि नयाँ सिजनको तयारीका क्रममा ब्राजिल छाडेयता उनले पहिलो अन्तर्वार्ता दिएका छन् । उनको यो अन्तर्वार्ता तीन मुख्य विषयमा केन्द्रित छ । पहिलो, विश्वकपको क्वाटरफाइनलबाटै ब्राजिल बाहिरिनु उनका लागि असह्य पीडा रह्यो । यो पीडा पनि कस्तो भन्दा नेयमार रोए नै ।

‘ब्राजिल फर्केयता न त मैले विश्वकप हेरें, हुँदा हुँदा मलाई बल पनि हेर्न मन लाग्न छाडेको थियो । म त निकै रोएँ,’ नेयमारले भनेका छन् । विश्वकप खेल्ने क्रममै नेयमारले पीएसजी छोड्ने र रियल म्याड्रिड जाने हल्ला पनि चल्यो । क्रिस्टियानो रोनाल्डोले रियल छोडयता यो हल्लाले अझ परिपक्वता पायो । तर होइन, नेयमार पीएसजी छाड्ने मनसायमा छैनन् । उनले स्पष्ट शब्दका भनेका छन्, यो विषयमा । उनको भनाइ थियो, ‘ढुक्क भए हुन्छ, म पीएसजीमै हुनेछुं ।’

अब तेस्रो विषय । के नेयमारले विश्वकपका क्रममा सबैलाई हँसाउने गरेर चोटको बढी नै अभियन त गरेनन । यस्तै यस्तै आरोपका कारण उनको धेरै आलोचना पनि भयो । धेरै ट्रोल बने । भन्नेले त के सम्म बोले भने नेयमारले आफ्नो यो नाटकको बानी छाडेनन् भने उनी उत्कृष्ट खेलाडीमा पनि गनिने छैनन् । यसमा नेयमारको जवाफ के रह्यो त ? उनको भनाइ थियो, ‘मैले नाटक गरेको होइन, यस्तो किन गर्थें र ? प्रत्येक ट्याकलमा मलाई साँच्चै दुखेकै हो ।’
–एजेन्सीको सहयोगमा