लिभरपुल (एजेन्सी)– लिभरपुलका स्टार मोहम्मद सलाह र सडियो माने नयाँ सिजनको लागि टोलीको अभ्यासमा फर्केका छन् । सलाहले इजिप्ट र मानेले सेनेगलकातर्फबाट विश्व कपमा सहभागी भएका थिए ।

त्यसपछिको केहि समयको विश्रामपछि दुवै अभ्यासमा फर्केका हुन् । यसबीच, क्लबको जर्सी नम्बर १० अब मानेले लाउने पक्का भएको छ । यसअघि सो नम्बर फिलिप्पे काउटिन्हाले लगाउने गर्थे । मानेले भने १९ नम्बर जर्सीले लगाउने गर्थे । काउटिन्हो पछिल्लो सिजन बार्सिलोना पुगेका थिए ।

सलाह, माने र मार्को ग्रुजिक तीनै खेलाडीले अभ्यासका दौरान बास्केटबल समेत गरेका थिए । तीनै खेलाडी लिभरपुलको प्रि सिजन अमेरिका भ्रमणमा टोलीका साथ रहने छन् । अमेरिकामा लिभरपुलले बोरुसिया डर्टमन्ड, प्रिमियर लिग प्रतिद्वन्द्वी म्यानचेस्टर सिटी र म्यानचेस्टर युनाइटेडसँग प्रतिस्पर्धा गर्नेछ ।

पछिल्लो सिजन उच्च प्रदर्शन गरेका सलाहले सबै प्रतियोगितामा गरि ५२ खेलमा ४४ गोल गरेका थिए । मानेले २९ प्रिमियर लिग खेलमा १० गोल गर्नुका साथै ७ गोलमा एसिस्ट गरेका थिए ।

लिभरपुलले नयाँ सिजनका लागि रोमाबाट गोलकिपर एलिसनबाट ६५ मिलियन पाउन्डमा अनुबन्धन गरेको छ । यो कुनै गोलकिपरलाई एउटा क्लबले खर्च गरेको यो अहिले सम्मकै सर्वाधिक रकम हो । त्यस्तै मोनाकोबाट फाविन्होलाई ४३ मिलियन पाउन्ड र साकिरीलाई स्टोकबाट १३.५ मिलियन पाउन्डमा भित्राइएको थियो ।

प्रिसिजनमा लिभरपुलले ४ वटा मैत्रीपूर्ण खेल खेलिसकेको छ, जसमा टोली अपराजित रहेको छ । योर्गन क्लोपको टोलीले चेस्टरलाई ७–० ले, ट्रेनमेरलाई ३–२ र ब्लाकबर्नलाई २–० ले हराएको थियो । बुर्नेसँग भने लिभरपुलले गोलरहित बराबरी खेलेको थियो ।