गुहावटी, माघ २९ । १२औं दक्षिण एसियाली खेलकुद साग अन्र्तगत नेपाली पुरुष फुटबल टिमले शनिबार फाइनल प्रवेशका लागि माल्दिभ्ससँग खेल्दैछ ।  खेल नेपाली समयअनुसार साँझ सवा सात बजेपछि नेशरु स्टेडियममा हुनेछ ।

बंगलादेशमा भएको बंगबन्धु गोल्डकपमा नवयुग श्रेष्ठको ह्याट्रिक मद्दतमा नेपालले माल्दिभ्सलाई ४–१ को फराकिलो अन्तरले पराजित गरेको थियो । नेपाली टिमका प्रशिक्षक राजुकाजी शाक्यले माल्दिभ्सविरुद्वको खेललाई फाइनलकै रुपमा लिने बताएका छन् ।
‘केही खेलाडीहरु घायते भएका कारण बंगलादेशविरुद्वको खेलमा उत्रन नसक्दा बंगलादेशसँग पराजित हुन पुग्यो ।’ प्रशिक्षक शाक्यले भने, ‘सेमिफाइनलका लागि नै उनीहरुलाई आरम दियौ । आशा छ उनीहरु माल्दिभ्सविरुद्वको खेलमा उत्रनेछ । बंगलादेशविरुद्वको खेलमा विमल घर्तीमगर, अन्जन विष्ट  र गोलरक्षक विकेश कुथुले खेलेका थिएनन् । यस्तै प्रशिक्षक शाक्यले माल्दिभ्सविरुद्वको खेलमा खेलाडीहरुले शत प्रतिशत खेल्दै फाइनल पुग्ने विश्वास लिएका छन् ।
यस्तै यसअघि नै फाइनलमा स्थान सुरक्षित गरिसकेको नेपाली महिला टिमले शनिबारै सिलोङमा श्रीलंकासँग लिग चरणको अन्तिम खेल खेल्नेछ । राउण्ड रोविनको आधारमा भएको खेलमा नेपाल सात अंकसहित शीर्ष स्थानमा छ ।
दक्षिण एसियाली खेलकुद सागमा नेपाल दुई पटक च्याम्पियन बनेको छ । नेपाल यसअघि सन् १९८४ र १९९३ मा च्याम्पियन बनेको थियो ।