टुरिन (एजेन्सी)– पोर्चुगल टोलीका कप्तान क्रिस्टियानो रोनाल्डोले आफु र अर्जेन्टिनाका स्टार लियोन मेस्सीसँग को उत्कृष्ट भन्ने खेल जीवनको अन्त्यमा मात्र निर्णय हुँदा उपयुक्त हुने बताएका छन् ।

युभेन्ट्समा सोमबार औपचारिक रुपमा सर्वाजनिक गर्दा सञ्चारकर्मीले सोधेको जवाफमा उनले मेस्सीसँगको प्रतिस्पर्धाका विषयमा जोगिएर जवाफ दिएका थिए । रियल म्याड्रिडमा ९ वर्ष लामो र सफल यात्राको अन्त्य गर्दै रोनाल्डो युभेन्ट्समा चार वर्षका लागि आबद्ध भएका छन् । उनी सम्मिलित रियलले ४ च्याम्पियन्स लिग र २ ला लिगा उपाधि जितेको थियो ।

मेस्सी र रोनाल्डोबीच सधै को उत्कृष्ट खेलाडी भनेर तुलना हुँदै आएको छ । रोनाल्डो सन् २००९ मा म्यानचेस्टर युनाइटेडबाट रियल पुगेपछि उनीहरु दुईबीचको प्रतिद्वन्द्विता थप चुलाउने प्रयास भएको थियो । उनले मेस्सीसँगको प्रतिस्पर्धा विषयमा बचेर जवाफ दिने क्रममा खेल जीवनको अन्त्यमा तुलना हुँदा सहि हुने बताएका छन् ।

‘म खेलाडीलाई प्रतिद्वन्द्विका रुपमा हेर्दैन । निश्चित हो हामी सबै खेल जित्न चाहन्छौं,’ रोनाल्डोले भने,‘त्यो ठूलो चुनौति हो । हरेकले जति सक्दो राम्रो खेल्ने र उत्कृष्ट हुने प्रयास गर्दछन् । त्यो साच्चै चाखलाग्दो प्रतिस्पर्धा हो ।’

उनले मेस्सीसँग पटक पटक हुने तुलनाका बारेमा भने,‘ हरेकले मेरो र मेस्सीको प्रतिद्वन्द्विताको कुरा गरिरहेका हुन्छन् । तर हामी आ आफ्नो खेल खेलिरहेका हुन्छौं । हरेकले आफ्नो क्लबका लागि खेल्छन् र म पनि त्यहि गर्छु । खेल जीवनको अन्त्यमा हामीमा को उत्कृष्ट हुन्छ हेरौं ।’