जाग्रेब (एजेन्सी)– विश्व कपको उपविजेता टोली क्रोएसियाली फुटबल टोलीको स्वदेशमा भव्य स्वागत भएको छ । रसियामा आइतबार भएको फाइनलमा फ्रान्ससँग ४–२ ले पराजित भएको भोली पल्टै टोली स्वादेश फर्केको थियो ।

लुका मोड्रिच र उनको टोलीलाई हजारौं समर्थकले भव्य स्वागत गरेका थिए । विश्व कप इतिहासमा क्रोएसियाको यो अहिले सम्मकै उच्च प्रदर्शन हो । विश्व कपमा मोड्रिचले गोल्डेन बल जितेका थिए ।यसअघि सन् १९९८ मा क्रोएसिया तेस्रो भएको थियो । त्यति बेला पनि फ्रान्स पहिलो पटक विजेता बनेको थियो । क्रोएसियाली खेलाडी मारियो मान्डजुकिचले सुरक्षाकर्मीको हेलमेटमा हस्ताक्षर गरेका थिए ।

आइतबारको फाइनलमा सुरुवाती समयमा क्रिोएसियाले खेलमा नियन्त्रणमा लिए पनि फ्रान्सले पहिलो गोल गर्न सफल भएको थियो । फ्रान्सले खेलको १८ औं मिनेटमा एन्टोइन ग्रिजम्यानको फ्रिकिकमा मारियो मान्डजुकिचले आत्मघाती गोल गर्दै फ्रान्सले अग्रता लिन सफल भएको थियो । तर २८ औं मिनेटमा इभान पेरिसिचको गोलमा क्रोएसिया फेरी खेलमा फर्किन सफल भएको थियो ।

खेलको ३८ औं मिनेटमा पेरिसिचको ह्यान्डबलमा फ्रान्सले पेनाल्टी जित्न सफल भएको थियो । ग्रिजम्यानले सो पेनाल्टी परिणत गर्दै फ्रान्सलाई खेलमा फेरी अग्रता दिलाएका थिए । पाउल पोग्बाले खेलको ५९ औं मिनेटमा गोल गर्दै स्कोर ३ –१ बनाएका थिए ।

डिबक्स बाहिरबाट किलियन एम्बाप्पेले गोल गर्दै ६५ औं मिनेटमा फ्रान्सको स्कोर ४–१ पारे । खेलको ६९ औं मिनेटमा ह्युगो लोरिसको गल्तीको सदुपयोग गर्दै मान्डजुकिचले गोल गर्दै स्कोर ४–२ पार्दै खेललाई रोमाञ्चक बनाएका थिए । हाइस्कोरिङ खेलको फाइनल त्यहि स्कोरमा अन्त्य भएको थियो ।