काठमाडौं (हाम्रो खेलकुद) – आज फुटबलको महाकुम्भ विश्वकप २०१८ को फाइनल खेल फ्रान्स र क्रोएसिया बीच खेलिंदै छ । लुज्निकी स्टेडियममा खेलिने सो खेल नेपाली समय अनुसार रातिको ८.४५ बजे सुरु हुने छ ।

विश्वकपको उपाधिसहित समर्थक र विश्लेषकहरु प्रतियोगिताको उत्कृष्ट खेलाडीले पाउने गोल्डेन बलको उपाधि कसले जित्ने छ भन्ने कुरामा पनि आतुर रहेका छन् । हिजो तेस्रो स्थानको प्ले-अफमा बेल्जियमको कप्तान एडेन हाजार्डले आफू पनि प्रवल दाबेदार रहेको सिद्ध गरिसकेका छन् ।

प्रतियोगिता सुरु हुन अघि नेयमार, रोनाल्डो र लियोनल मेस्सीलाई यस उपाधिको दाबेदार मानिए पनि उनीहरु र उनीहरुका राष्ट्रबाट सोचेअनुरुप प्रदर्शन हुने सकेन । क्रोएसियाले यस विश्वकपमा सबैलाई आश्चर्यचकित पार्दै फाइनलसम्मको यात्रा तय गरेको छ ।

क्रोएसियाको यस यात्राका नायक रहेका छन् उनका कप्तान लुका मोड्रिच । दुई गोल गरेका मोड्रिच मिडफिल्डमा खेल्दै खेल नियन्त्रण गर्ने भुमिकामा देखा परेका छन् । मोड्रिचसंगै विश्वकपमा आफूलाई चिनाउन सफल किलियन एम्बाप्पेलाई पनि सो उपाधिको दाबेदार मानिएको छ ।

एम्बाप्पे आफ्नो गति, ड्रिब्लिङ क्षमता र शटिक प्रहारका लागि विश्वकपमा प्रख्यात बनिसकेका छन् । हाजार्डले जस्तै एम्बाप्पेले पनि प्रतियोगितामा ३ गोल गरेका छन् ।

तपाईंको अनुमानमा गोल्डेन बल कसले जित्ने छ?