म्याड्रिड (एजेन्सी)– नेयमारलाई लिने विषयमा चलेका सबै हल्ला निराधार भएको रियल म्याड्रिडले जनाएको छ । सुपर स्टार क्रिस्टियानो रोनाल्डो यो साता युभेन्ट्स गएपछि रियलले नेयमार भित्राउने प्रयास थालेको सञ्चारमाध्यमले जनाएका थिए । नयाँ खेलाडी भित्राउने विषयमा केहि नयाँ नीति अख्तियार गरेको उल्लेख गर्दै रियलले केहि स्टारहरुसँग छलफल अघि बढेको जनाएको छ ।

रियलले प्रेस विज्ञप्ती जारी गर्दै पेरिस सेन्ट जर्मेनका स्टारद्वय नेयमार र केलिनि एमबाप्पेलाई लिने विषयमा कुनै छलफल नभएको प्रष्ट पारेको छ । रियलले नेयमार र एमबाप्पे भित्राउन चाहेको सञ्चारमाध्यमले बारम्बार प्रकाशित गर्दै आएका छन् । रोनाल्डोको बहिर्गमनपछि यो चर्चा झनै चुलिएको थियो ।

‘पिएसजी खेलाडीलाई लिने प्रयास भइरहेको भन्ने समाचार हामीले हेरिरहेका छौं । तर क्लब यो प्रष्ट पार्न चाहन्छ उनलाई लिन कुनै प्रस्ताव गर्ने योजना छैन,’ विज्ञप्तीमा भनिएको छ , ‘दुई क्लबबीचको सम्बन्ध असाधारण छ । खेलाडीका विषयमा कुनै पनि विषय अघि बढाउनु परेको खण्डमा पहिलो क्लबसँग छलफल हुनेछ । ‘

नेयमारले पनि आफ्ना नजिकका साथीहरुसँग अझै एक सिजन पिएसजीमै रहन चाहेको बताएको जनाइएको छ । नेयमार गत सिजनमात्र विश्व कीर्तिमानी रकममा बार्सिलोनाबाट पिएसजी पुगेका थिए ।