म्याड्रिड (एजेन्सी)– क्रिस्टियानो रोनाल्डोले क्लब छाडेसँगै रियल म्याड्रिडले अनेक विकल्प खोज्न थालेको छ । त्यसमध्ये एउटा लोनमा बायर्न म्युनिखमा रहेका हामेस रोड्रिग्वेजलाई फर्काउने विषयमा पनि क्लब सकारात्मक रहेको बताइएको छ ।

कोलम्बियन स्टार रोड्रिग्वेजको लोन सम्झौता सन् २०१९ जुन ३० सम्म रहेको छ । त्यसपछि पनि बायर्नले उनलाई स्थायी रुपमा क्लबमा राख्न सक्ने विकल्प छ । यदि स्थायी सम्झौता भएको खण्डमा भने उनी रियल फर्कने सम्भावना टुंगिनेछ ।

मार्काका अनुसार रियलका अध्यक्ष फ्लोरिन्टिनो पेरेज र रोड्रिग्वेज स्वयम पनि बायर्नबाट पुन स्पेन फर्कन इच्छुक रहेको बताइएको छ । जर्मन च्याम्पियन बायर्नले लोन सम्झौता टुंगिएपछि उनलाई स्थायी रुपमा क्लबमा भित्राउन सक्ने बताउँदै आएको छ । तर, अहिले परिस्थिति बदलिएको छ ।

क्लबका सुपर स्टार रोनाल्डो इटालियन क्लब युभेन्ट्स जानुअघि प्रशिक्षक जिदेदिन जिदानले पनि रियल छाडिसकेका छन् । तर, क्लबका नयाँ प्रशिक्षक जुलेन लोपेटेगुईको योजनामा रोड्रिग्वेज पर्छन् कि पर्दैन त्यो महत्वपूर्ण विषय हुनेछ । बायर्न जानुअघि रोड्रिग्वेजले रियलसँग २०२१ सम्मको सम्झौता गरेका थिए ।

सन् २०१४ को विश्व कपमा उच्च प्रदर्शन गरेपछि उनी रियल पुगेका थिए । पहिलो सिजन ४६ खेल खेल्ने क्रममा १७ गोल गरेका रोड्रिग्वेजले १८ एसिस्ट गरेका थिए । तर, जब राफा बेनिटेजले क्लबको प्रशिक्षण सम्हाले र त्यसपछि जिदानले नेतृत्व लिए त्यसपछि भने उनी पहिलो रोजाइका लागि संघर्ष गर्न बाध्य भए ।

एट्याकिङ मिडफिल्डरले बार्यनमा गत सिजन ३९ खेलमा ८ गोल गर्नुका साथै १४ एसिस्ट गरे । जिदान र रोनाल्डोको बर्हिगमनसँग क्लबका अध्यक्ष उनलाई फर्काउने योजनामा रहेको र जसले युरोपियन च्याम्प्यिन क्लबमा पुरा मौका पाउन सक्ने विश्वास गरिएको छ ।