म्याड्रिड (एजेन्सी) – स्पेन तथा रियल म्याड्रिडका पूर्व डिफेन्डर मिचेल सालगाडोले इडेन हजार्ड र नेयमारले रियलमा क्रिष्टियानो रोनाल्डोको स्थान लिन नसक्ने बताएका छन् । रियलले रोनाल्डोलाई मंगलबार इटालियन क्लब युभेन्टस् प्रस्थानका लागि स्वीकृति दिएको थियो । ९ वर्ष रियलमा बिताएका रोनाल्डो १ सय मिलियन पाउण्डमा चार वर्षका लागि युभेन्टस्मा अनुबन्धन हुने पक्का भइसकेको छ ।

रोनाल्डोको विकल्पमा क्लबले मोहम्मद सलाह, हजार्ड, नेयमार र किलियन एमबाप्पे जस्ता खेलाडीलाई अनुबन्ध गर्ने प्रयास गर्न सक्ने बताइएको छ । तर, सालगाडोले रोनाल्डोको जस्तै रियलमा प्रभाव जमाउन नसक्ने बताएका छन् । ‘रोनाल्डो अपरिवर्तनिय खेलाडी हुन् । उनले रियलमा थुपै्र कीर्तिमानहरु बनाएका छन्, उनले भने, उनी रियलको सर्वाधिक गोलकर्ता पनि हुन् । नेयमार र हजार्ड पनि उत्कृष्ट खेलाडी हुन् । मैले उनीहरु नराम्रा खेलाडी भन्न खोजेको हैन ।’

सालगाडोले एक अन्र्तवार्तामा भनेका छन्, ‘जसरी रोनाल्डोले रियालमा व्यक्तिगत कीर्तिमानहरु बनाएका छन् । त्यस्तै कीर्तिमान रोनाल्डोको विकल्पमा आउने खेलाडीले बनाउन सक्दैनन् भन्ने मेरो धारणा हो । तर, सान्टियागो बर्नाबेउमा नेयमार, हाजार्ड र एमबाप्पे जस्ता स्टार खेलाडीको अत्यन्तै आवश्यकता छ । उनीहरुलाई जुनसुकै मुल्य चुकाएर भएपनि क्लबले अनुबन्ध गर्न सक्नुपर्दछ ।’ यस्तै सालगाडोले रियालका नवनियुक्त प्रशिक्षक जुलेन लुप्टेगुईमा टोलीमा व्यापक परिवर्तन गर्न आवश्यक रहेको बताएका छन् ।