मस्को (एजेन्सी)– इङ्ल्यान्डका सञ्चारमाध्यमले आफुहरुलाई कमजोर आकेको क्रोएसियाका कप्तान लुका मोड्रिचले बताएका छन् । विश्वकप सेमिफाइनलमा इङ्ल्यान्डलाई २–१ ले हराएपछि मोड्रिचको यस्तो भनाई सार्वजनिक भएको हो ।

थप समयमा मारियो मान्डुकिजले गोल गरेपछि क्रोएसियाले आइतबार हुने फाइनलका लागि फ्रान्ससँगको भेट पक्का गरेको थियो । खेलअघि गेराथ साउथगेटको इङ्ल्यान्डलाई क्रोएसियामाथि हावी हुने अनुमान गरिएको थियो । क्रोएसियाले सेमिफाइनलअघिका दुई खेल थप समय र पेनाल्टीमा पुगेर दुई पटक जितेकाले पनि इङ्ल्यान्ड हावी हुने अनुमान थियो ।

मोड्रिचले इङ्लिस सञ्चारमाध्यम सेमिफाइनल अघि नम्र र आदर देखाउनु पर्ने बताएका छन् । ‘जे हाम्रा विषयमा चर्चा थियो । हामीले फरक ढंगले आफुलाई प्रमाणित गरेका छौं । विशेषत इङ्लिस पत्रकार, टेलिभिजन पण्डितहरुले क्रोएसियालाई कम आक्नु गल्ति थियो,’ मोड्रिचले भने, हामीले सबै भनाईलाई ग्रहण गर्यौं । पढ्यौं र हामीले भन्यौं, ठिक छ । खेलमा देखियो कसले बढी प्रयास गर्यो । उनीहरुले विपक्षीलाई नम्र र आदरणीयभाव देखाउनु राम्रो हुन्थ्यो ।’

रियल म्याड्रिडका मिडफिल्डर मोड्रिचले क्रोएसियाले इङ्ल्यान्डलाई मानसिक र शारीरिक रुपमा पछि पारेको बताए । यद्दपी इङ्ल्यान्डले पटक पटक अग्रतलाई दोब्बर पार्ने मौका खेर फालेको थियो । ‘हामी थाकेका छैनौं भनेर फेरि एकपटक प्रमाणित गरेका छौं । हामीले मानसिक र शारीरिक रुपमा पनि उनीहरुलाई दबाबमा राख्यौं,’ उनले भने, ‘हामीले थप समयमा भन्दा अघि नै नतिजा निकाल्नुपर्थ्यो । तर पनि हामी सफलता अद्भुद छ । यो सपना साचो भए सरह हो ।’

विश्व कप फाइनल पुग्नुलाई क्रोसियाली खेलकुद इतिहासका लागि महत्वपूर्ण सफलता रहेको र त्यसमा सबैलाई गर्व लागेको बताउँदै उनले भने, यो उत्कृष्ट क्षण मध्येको एक हो । यदि हामी फाइनलमा पनि सफल भयौं भने त्यो अहिले सम्मकै उत्कृष्ट हुनेछ ।