म्याड्रिड (एजेन्सी) – क्रिस्टियानो रोनाल्डोले हिजो युभेटससंग आधिकारिक रुपमा सम्झौता गरेका हुन् । १ सय मिलियन युरोको सम्झौतामा युभेन्टस आएका रोनाल्डोले त्यहां वार्षिक ३० मिलियन युरो कमाउने छन् ।

रोनाल्डो युभेन्टस आएसंगै सामाजिक सञ्जालहरुमा उनका लागि विभिन्न खेलाडीहरुले आदर व्यक्त गरे । रियलका कप्तान सर्जियो रामोस र रियलमा रोनाल्डोलाई अग्रपंक्तिमा साथ दिएका ग्यारेथ बेलले रोनाल्डोको बारेमा मीठा शब्दहरु ट्विटरमार्फत व्यक्त गरे ।

रामोसले लेखे,” तिम्रो गोलहरु र जे जति हामीले साथ जितेका छौं, तिम्रो नाम सुनौलो अक्षरमा रियल म्याड्रिडको इतिहासमा लेखिइसकेको छ । तिमीलाई सधै सम्झिने छौं । तिमीसंग खेल्न पाएकोमा खुसी छु । शुभकामना !”

त्यस्तै बेलले पनि रोनाल्डोसंग ५ वर्षसंगै खेल्न पाएकोमा गर्व लागेको बताउंदै शुभकामना व्यक्त गरे । युवा खेलाडी मार्को एसेन्सियोले रोनाल्डो आफ्नो लागि उदाहरण रहेको बताए । रोनाल्डोको रियल म्याड्रिडका पूर्व सहकर्मी सामि खेडिराले “टुरिनमा स्वागत छ ।” भन्दै ट्विट गरे । खेडिरा पनि रियल छाडै युभेन्टस गएका हुन् ।

रोनाल्डोले रियल म्याड्रिडबाट ४ सय ५० खेल खेल्दै ४ सय ३८ गोल गर्न सफल भए । त्यस अवधिमा उनले २ लालिगा, ४ च्याम्पियन्स लिग र ४ बलोन डि’ओर जित्न सफल रहे ।