सेन्ट पिटर्सबर्ग (एजेन्सी) – आज राति विश्वकप २०१८ को सेमिफाइनल अन्तर्गत दाबेदार टोली फ्रान्स लयमा रहेको बेल्जियमसंग भिड्दै छ । नेपाली समयानुसार सो खेल रातिको ११.४५ बजे सुरु हुने छ ।

फ्रान्सको सम्भावित सुरुवाति ११ यस प्रकारको छ :

डिफेन्स

फ्रान्सले गोलपोस्टमा कप्तान तथा नियमित नं. १ ह्युगो लोरिसलाई नै खेलाउने छन् । यस प्रतियोगितामा केही राम्रा बचाऊ गर्दै फ्रान्सलाई उनले यहांसम्म पुर्‍याएका छन् । त्यस्तै बार्सिलोनाका साम्युयल उम्टिटी र रियल म्याड्रिडका रफायल भरानले मध्य डिफेन्स सम्हाल्ने छन् । बेन्जामिन पाभार्ड र लुकास हर्नान्डेजले साइड डिफेन्समा निरन्तरता पाउने छन् ।

मिडफिल्ड

मध्यपंक्तिमा फ्रान्सका लागि दुई ठूला नाम एङोलो कान्टे र पल पोग्बा उसको सबैभन्दा ठूलो हतियार हो । डिफेन्सलाई सुरक्षित राख्दै हर्नान्डेज र पाभार्डलाई पनि आक्रमण गर्न उनीहरुले स्वतन्त्रता प्रदान गर्दछन् । पोग्बा र कान्टेलाई ब्लेज माटुइडीले साथ दिने देखिन्छ । अघिल्लो खेलमा उनी प्रतिबन्धित थिए तर यस खेलमा भने सुरुवाती ११ मा फर्किने अपेक्षा छ ।

फरवार्ड

फ्रान्सले फरवार्ड लाइनमा नबिल फेकिर, उस्माने डेम्बेले र फ्लोरियन थबिनलाई अवसर दीसकेको छ तर ओलिभर जिरुडको स्थान जित्न उनीहरुलाई गाह्रै परेको छ । पूर्व आर्सनलका खेलाडी जिरुड कर्नर र फ्रिकिकमा फ्रान्सका लागि हतियार हुने छन् । त्यस्तै उनले लयमा रहेका किलियन एम्बाप्पे र एन्टोइन ग्रिजम्यानको साथ पाउने छन् ।

फ्रान्सको टोलीमा कोही प्रतिबन्धित छैनन् र सबै फिट नै छन् । यसकारण फ्रान्सले आफ्नो सबैभन्दा बलियो सुरुवाती ११ उतार्ने छ । फ्रान्सले उतार्ने सुरुवाती ११ प्रतियोगितामा संगै धेरै पटक खेलेका छन् र यसकारण टोलीमा स्थिरता रहेको छ ।

के फ्रान्सले जित हांसिल गर्दै फाइनलमा स्थान बनाउला?