मस्को (एजेन्सी)– विश्वकप सेमिफाइनलमा बेल्जियमका इडेन हाजार्ड र रोमेलु लुकाको सबैभन्दा ठूलो खतरनाक हुने फ्रान्सका रक्षक राफेल भेरानले बताएका छन् । बेल्जियम र फ्रान्सबीच मंगलबार पहिलो सेमिफाइनल हुँदैछ । सेमिफाइनलको ठिक अघि विश्व कप जित्नेका लागि उनीहरुको चुनौति पार गर्दै अघि बढ्नुपर्ने उनको भनाई थियो ।

लुकाकु र हाजार्ड दुवैले रसिया विश्वकपमा उच्च प्रदर्शन गरिरहेका छन् । फ्रान्सका सेन्टर ब्याक भेरान पनि विश्वकपमा उच्च प्रदर्शन गर्ने मध्येमा पर्दछन् । उनी बेल्जियमलाई हल्का लिन नमिल्ने बताउँछन् । ‘यो विश्व कप सेमिफाइनल हो । यहाँ आएर एउटा टोली मात्र दाबेदार हुँदैन । हामीले आफ्नो उत्कृष्ट दिने प्रयास गर्नुपर्दछ,’ उनले भने, ‘हरेक खेललाई हामी अलग ढंगले लिन्छौं । त्यसमा सफल नतिजाको प्रयास गर्नेछौं ।’

भेरानले बेल्जियन टोली युवा भएपनि परिवक्क रहेको उल्लेख गरे । ‘हामीलाई थाहा छ खेल कठिन हुनेछ ,’ उनले थपे, ‘शारीरिक रुमा बलिया लुकाकु जुन सुकै रक्षापक्तिका लागि पनि खतरानाक हुनसक्दछन् । उनी स्तरीय खेलाडी हुन्, उनलाई हामीले कुनै ठाँउ दिनुहुन्न ।’

उनले हाजार्डको पनि तारिफ गरेका छन् । ‘उनी जति बेला लिलमा थिए त्यति बेला म उनको विरुद्धमा खेलिसकेको छु,’ रियल म्याड्रिडका रक्षक उनले भने, ‘उनी स्तरीय खेलाडी हुन् र उनको ड्रिब्लिङ निकै राम्रो छ । हामी उनलाई पनि कुनै ठाँउ दिनेमा छैनौं । हामी सामूहिक रुपमा उनलाई रोक्ने प्रयास गर्नेछ ।’

क्वार्टरफाइनलमा उरुग्वेलाई २–० ले हराउँदा भेरानले पनि गोल गरेका थिए । रक्षापक्तिमा पनि उनले निरन्तर उच्च प्रदर्शन गरिरहेका छन् । बेल्जियमको आक्रमणलाई रोक्न उनको भूमिका महत्वपूर्ण हुने विश्वास गरिएको छ ।