म्याड्रिड (एजेन्सी)– युरोपियन च्याम्पियन रियल म्याड्रिडले चेल्सीका स्टार इडन हाजार्डलाई आफ्नो प्लान बीमा राखेको बताइएको छ । यदि नेयमार भित्राउन नसकेको खण्डमा रियलले हाजार्ड किन्ने प्रयास गरिने सञ्चारमाध्यमले उल्लेख गरेका छन् । लामो समयदेखि नै रियल हाजार्ड भित्राउनमा इच्छुक रहँदै आएको बताइएको छ । हाजार्डले पनि आफु रियल जान चाहेको बताएका थिए ।

क्रिस्टियानो रोनाल्डोको भविष्य पनि अझै अनिश्चित रहेकोले रियलको अबको कदम के हुने भन्नका लागि केहि दिन कुर्नुपर्ने हुन्छ । रियलले हाजार्डका लागि आकर्षक प्रस्ताव लान सक्ने सम्भावना रहेको छ । यद्दपी त्यसका लागि टोलीले हतार गरेको भने छैन । रियल अझै पनि नेयमारलाई पेरिस सेन्ट जर्मेनबाट भित्राउने आशामा रहेको छ ।

पछिल्लो पाँच वर्ष चेल्सी जस्तो ठूलो क्लबबाट खेल्दा हाजार्डको गति, ड्रिब्लिङलगायतका अन्य क्षमता विश्वले देखिसकेको छ । त्यसमाथि रसियामा जारी विश्वकपमा पनि उच्च प्रदर्शन गर्नेमध्ये हाजार्ड एक हुन् ।

अघिल्लो विश्वकपमा उच्च प्रदर्शन गरेकै कारण फाबियो कानाभारो, मेसुट ओजिल, टोली क्रुस र हामेस रोड्रिग्वेजलाई रियलले भित्राएको थियो । चेल्सीसँग हाजार्डको सम्झौता सन् २०२० सम्म रहेको छ । नेयमार भित्राउन नसकेको खण्डमा रियलले हाजार्डका लागि आकर्षक प्रस्ताव लाने भने लगभग तय छ ।