मस्को (एजेन्सी)– रसियामा जारी विश्वकप फुटबल अन्तिम चरणमा पुगेको छ । अब अन्तिम चार खेल बाँकी रहँदा विश्व कपको गोल्डेन बल कसले जित्दा भन्ने चर्चा पनि सुरु भएको छ । फ्रान्स, बेल्जियम, इङ्ल्यान्ड र क्रोएसिया यसपटक सेमिफाइनल पुग्न सफल टोली हुन् ।

विश्व कप सुरु हुनु अघि लियोनल मेस्सी, नेयमारलाई गोल्डेन बलका सम्भावित दाबेदारका रुपमा हेरिएको थियो । तर, मेस्सीको अर्जेन्टिना अन्तिम १६ र नेयमारको ब्राजिल क्वार्टरफाइनलबाट बाहिरिएपनि गोल्डेन बलका लागि अन्य खेलाडी दाबेदारका रुपमा देखा परेका छन् । ती मध्ये तीन खेलाडीको बारेमा यहाँ चर्चा गरिएको छ ।

केलियन बाप्पे – फ्रान्स

यसपटक विश्वकपमा प्रभाव पार्ने खेलाडी मध्ये बाप्पे एक हुन् । विश्वकप का दौरान यी १९ वर्षे फरवार्ड उच्च फर्ममा देखिएका छन् । समूह चरणमा पेरुविरुद्धको गोल विश्वकपमा उनको पहिलो गोल थियो । पेरिस सेन्ट जर्मेनका यी खेलाडीले लियोन मेस्सी सम्मिलित अर्जेन्टिनाविरुद्धको प्रिक्वार्टरफाइनलमा उच्च प्रदर्शन गरेका थिए ।

जसमा उनले २ गोल गरे । यद्दपी उरुग्वेविरुद्धको क्वार्टरफाइनलमा भने उनको प्रदर्शन अपेक्षा गरिएभन्दा कमजोर रह्यो । बेल्जियमविरुद्ध हुने सेमिफाइलन उनी लयमा देखिने विश्वास गरिएको छ ।

इडेन हाजार्ड -बेल्जियम

बेल्जियमको स्वर्णिम पुस्ता मानिएको अहिलेको फुटबल टोलीले विश्वकपको सेमिफाइनलमा पुर्याएर आफुलाई थप प्रमाणित गरिसकेको छ । त्यसमध्ये पनि कप्तान हजार्डको प्रदर्शन प्रशंसनीय छ । लिडिङ फ्रम द फ्रन्ट भने जस्तै उनले नेतृत्व गरिएका छन् । उनले जापानसँगको प्रिक्वार्टरफाइनल र ब्राजिलविरुद्धको क्वार्टरफाइनलमा पनि निर्णायक खालको भूमिका निर्वाह गरेका थिए ।

जस्तै कठिन परिस्थितिमा पनि उनले निरन्तर प्रभावशाली प्रदर्शन गरिरहेका छन् । सेमिफाइनलमा पनि उनीबाट समर्थकले त्यस्तै अपेक्षा गरेको हुनुपर्दछ । तीन खेलमा म्यान अफ दी म्याच बनिसकेका हजार्डले दुई गोल गर्नुका साथै दुई गोलमा असिस्ट पनि गरेका छन् ।

लुका मोड्रिच – क्रोएसिया

हाजार्ड र मोड्रिचबीच यो विश्वकपमा को उत्कृष्ट भन्न त्यति सहज छैन । दुवै टोलीले उच्च प्रदर्शन गरिरहँदा दुवै कप्तानको भूमिका उत्तिकै महत्वपूर्ण रहँदै आएको छ । हाजार्डले जस्तै मोड्रिचले पनि अगाडि रहेको टोलीको मोर्चा सम्हालिरहेका छन् । रियल म्याड्रिडका मिडफिल्डर मोड्रिच यो विश्वकपका उत्कृष्ट मिडफिल्डर मध्ये एक हुन् । रसियाविरुद्धको उनको प्रदर्शन प्रशंसनीय रह्यो । उनले पनि तीन खेलमा म्यान अफ दी म्याच अवार्ड जितिसकेका छन् ।