टुरिन (एजेन्सी)– क्रिस्टियानो रोनाल्डोले आफु युभेन्ट्स जान चाहेको रियल म्याड्रिडलाई जानकारी दिएको गुलिम बालाग्युले बताएका छन् । इटालियन च्याम्पियन युभेन्ट्सले पाँच पटकको बालोन डि ओर विजेता रोनाल्डोका लागि रियलमा ८८ मिलियन पाउने प्रस्ताव गरेको बताइको छ ।

स्पेनिस फुटबल विश्लेषक बालाग्युले रोनाल्डो टुरिन जान चाहेको र रियलले पनि उनलाई जान दिने वातावरणका लागि तयारी थालेको बताएका छन् । पोर्चुगिज कप्तानले रियलमा सफलतापूर्वक नौ सिजन बिताइसकेका छन् ।

‘रियल र रोनाल्डोलाई एकअर्काको मनसाय राम्ररी थाहा छ ,’ बालाग्युले भने,’ रोनाल्डोका प्रतिनिधि र रियलबीच छलफल भएको छ । त्यहाँ उनी जान चाहेको बताइएको छ । रियलले पनि युभेन्ट्सको प्रभावलाई सकारात्मक रुपले लिएको छ ।’

बोलाग्युका अनुसार युभेन्ट्सले जार्ज मेन्डिस र रोनाल्डोलाई चार वर्षको सम्झौता र बार्षिक ३० मिलियन युरोको प्रस्ताव गरेको छ । मेन्डिस रोनाल्डोको एजेन्ट हुन् । युभेन्ट्स, रियल र मेन्डिसकाबीच थप छलफल हुने तय भएको बताइएको छ । मेन्डिसले रोनाल्डो रियलप्रति अभारी रहेको र नौं वर्ष लामो यात्रा निकै सुखद रहेको अनुभव गरेको बताएका छन् ।

‘यदि यो सम्झौता भयो भने नयाँ चरणमा प्रवेश हुनेछ । नयाँ चुनौति र बाँकी खेल जीवनका लागि यो महत्वपूर्ण हुनेछ,’ मेन्डिसले भने, ‘रोनाल्डोले रियल छाडेपनि उनी क्लब, यसका अध्यक्ष, निर्देशक, अन्य स्टाफ, खेलाडी र समर्थकप्रति आभारी रहनेछन् ।’

युभेन्ट्सका प्रबन्ध निर्देशक गुसिप्पी मोराटाले पनि रोनाल्डोको सुरुवा हुने सम्भावना रहेको बताएका छन् । ‘युभेन्ट्स समर्थकलेले रोनाल्डोलाई लिएर सपना देख्न थालेका छन्,’ उनले भने, ‘तर अहिले यो विषयमा धेरै नबोलौं ।’