मस्को (एजेन्सी)– ब्राजिलियन पाउलिन्हो र गाब्रियल जिसस विश्वकपको क्वार्टरफाइनलबाट बाहिरिनु निकै निराशाजनक भएको बताएका छन् । बेल्जियमसँग क्वार्टरफाइनलमा २–१ ले पराजित हुँदै पटकको विजेता विश्व कपबाट बाहिरिएको छ । दुवैले आफ्नो प्रदर्शन पनि सन्तोषजनक हुन नसकेको स्वीकार गरे ।

फेर्नाडिन्होको आत्मघाती गोल र केभिन डि ब्रुयनेको गोलबाट पछि परेको ब्राजिलका लागि रेनाटो अगुस्टोले गोल फर्काएका पनि खेलमा फर्कन त्यो पर्याप्त भएन । जर्मनीसँग सन् २०१४ को विश्वकप सेमिफाइनलमा पराजित हुँदा भन्दा पनि यसपटकको हार बढी पिडादायक भएको बताए । घरेलु मैदानमा त्यति बेला ब्राजिल जर्मनीसँग ७–१ ले पराजित भएको थियो ।

बेल्जियमविरुद्ध अन्तिम समयसम्म पनि टोलीले प्रयास गरेपनि सफलता नमिलेको उनको भनाई थियो । ‘मेरा लागि दुवै कठिन रहे,’ पाउलिन्होले टेलिभिजन अन्तरवार्ताका क्रममा भनेका छन्,’२०१४ को हार पनि सहन मुस्किल थियो । यो हार त्यो भन्दा बढी पिडादायी रह्यो ।’

बार्सिलोनाका मिडफिल्डरले थपे, ‘हामी अन्तिम सेकेन्ड सम्म लड्यौं । जबकी खेलमा हामी सबै क्षेत्रमा हावी थियौ । गाब्रियल जिससले पनि टोलीको हार र आफ्नो प्रदर्शनबाट निराश भएको बताए । उनले यो विश्व कपमा एक गोल पनि गर्न सकेनन् ।

‘साच्चै दिक्दार लाग्दो रह्यो । मैले धेरै मेहनत गरे । ठूलो प्रतियोगितामा सबैले आफ्नो तर्फबाट शतप्रतिशन दिने कोसिस गर्यौं,’ म्यानचेस्टर सिटीका उनले भने, ‘सबैलाई थाहा थियो, यो हाम्रो सपना थियो । तर हामी असफल भएका छौं ।’

ब्राजिलले पछिल्लो पटक २००२ मा विश्वकप जितेको थियो । विश्व कप छनोटमा उच्च प्रदर्शन गरेपनि ठूला प्रतियोगितामा ब्राजिल चुक्दै आएको छन् । २००७ पछि ब्राजिलले कोपा अमेरिकाको उपाधि पनि जित्न सकेको छैन ।