बिबिसीलाई ललित स्मृति फुटबल उपाधि

ललितपुर (हाम्रो खेलकुद)– ब्रिगेड ब्वाइज क्लब (बिबिसी) ले ललित स्मृति यु १८ च्याम्पियनसिप फुटबल उपाधि जितेको छ । दुई पटकको विजेता त्रिभुवन आर्मी क्लबलाई १–० ले हराउँदै बिबिसीले उपाधि जितेको हो ।

तस्बिरहरु- विवेक सुवदी/हाम्रो खेलकुद

सातदोबाटो स्थित एन्फा कम्प्लेक्सको एस्ट्रो टर्फमा शुक्रबार भएको फाइनलमा अनुप गुरुङको गोल निर्णायक बनेको थियो । खेल सकिन ३ मिनेट बाँकी रहँदा अनुपले गोल गरेका थिए । आर्मीले खेलमा निरन्तर दबाब कायम राखे पनि गोल गर्न भने सकेन।

बिबिसीले ३ लाख र आर्मीले १ लाख ५० हजार रुपैयाँ प्राप्त गर्नेछ ।

अखिल नेपाल फुटलब संघ (एन्फा) का तत्कालिन कार्यवहाक अध्यक्ष ललितकृष्ण श्रेष्ठको स्मृतिमा जेठ २९ गतेबाट च्याम्पियनसिप सुरु भएको थियो । च्याम्पियनसिपमा १४ ए डिभिजनसहित १८ टोलीको सहभागिता रहेको थियो ।

२०७२ जेठ २९ गते भैसीपाटीस्थित नयाँ घरमा सरेकी दिन करेन्ट लागेर श्रेष्ठको मृत्यु भएको थियो । उनकै स्मृतिमा एन्फाले हरेक वर्ष च्याम्पियनसिप आयोजना गर्दै आएको छ ।