टुरिन (एजेन्सी) – केही दिन यता रियल म्याड्रिडका सुपरस्टार क्रिस्टियानो रोनाल्डो युभेन्टस जाने हल्ला निकै चर्किएको छ । त्यस बीच युभेन्टसका निर्देशक बेप्पे मरोटाले त्यस विषयमा केही नबोल्ने बताएका छन् ।

रोनाल्डो युभेन्टस आउने हल्ला सांचो हो वा होइन भनेर मारोटालाई हिड्दै गर्दा सोध्दा उनले जवाफ दिए, “रोनाल्डो? अहिले म केही बोल्दिन ।” युभेन्टसले रियल म्याड्रिडलाई १ सय मिलियन युरोको प्रस्ताव राखेको खबर छ ।

३३-वर्षे फरवार्ड रोनाल्डो रियल म्याड्रिडका सर्वाधिक गोलकर्ता हुन् । रियल म्याड्रिडमा उनले ४ पटक च्याम्पियन्स लिग पनि जितेका छन् । १ सय मिलियनमा रियल म्याड्रिड नमाने १ सय २० मिलियन युरो खर्चिन युभेन्टस तयार रहेको जनाइएको छ ।

रियल म्याड्रिडले सो प्रस्ताव अहिले सोच्दै गरेको विभिन्न श्रोतहरुले जनाएका छन् । रोनाल्डो युभेन्टसमा सरुवा भए ३० मिलियन युरो वार्षिक  कमाउने छन् । युभेन्टसले अघिल्लो साता रोनाल्डोको एजेन्टलाई पनि भेटेका थिए ।

च्याम्पियन्स लिगको उपाधि जितेपछि रोनाल्डो आफू रियल म्याड्रिडमा रहनेमा अनिश्चितता प्रकट गरेका थिए ।  रोनाल्डो भर्खरै विश्वकपबाट पोर्चुगलसंग बाहिरिएका हुन् । ४ खेलमा रोनाल्डो ४ गोल गर्न सफल भएका हुन् ।